KNR-TV-mi inuusuttunut aallakaatitassiaq nutaaq
Inuusuttunut aallakaatitassiaq nutaaq ’Tillerneq’ ullumi KNR-TV-mi aallakaateqqaarneqassaaq. Aallakaatitassiami siullermi atoqatigiinneq sammineqassalluni. Aallakaatitassiami Vivi Sørensen aaqqissuisuuvoq ilisarititsisuullunilu.
-Aallakaatitaq siulleq atoqatigiinnermut tunngasussaammat assillu maajunnarsinnaasut takutinneqartussaammata aallakaatitaq meeqqanut naleqqutinngilaq, taama aaqqissuisoq Vivi Sørensen ilisimatitsivoq.
Aallakaatitassiap ingerlanerani tusaamasat isummerlutik oqaaseqartartussat peqataasassapput, soorlu nipilersortartut tusaamaneqarluartut Kimmernaq Kjeldsen, Maasi Pedersen aamma Henrik Høyer Jensen apeqqutit asanninnermut tunngasut akissuteqarfigiumaaraat.
Tillernermi sammineqartartussat ilagaat ilinniarnermut aamma imminut tatiginermut tunngasut.
Aallakaatitassiaq pingasunngornikkut nal.16.30 takutinneqartassaaq aallakaatinneqaqqittassallunilu nal. 22.35.
