KNR TV-mi inuusuttunut aallakaatitassiaq nutaaq
Inuusuttoq piginnaasaqarluartoq Marc Fussing Rosbach qarasaasiakkut pinnguaatinik – computerspilinik aallakaatitassiami saqqummiussisassaaq taavalu ilisimaneqarluartut Malik Kleist aamma Qillannguaq Berthelsen film-inik nutaanik, dvd-inik kiisalu cd-nik nutaanik saqqummiussisassallutik.
-Qarasaasiatigut pinnguaatit inuusuttut inuunerannut ilaalluinnalersimapput. Peqatigisaanik Ilulissani, Sisimiuni Nuummilu filmeriartartut filmit nutaat pillugit oqaluttuunneqartalissapput, tamarmilli periarfissaq tamanna piginngimmassuk dvd-inik taavalu cd-inik nutaanik kikkut tamarmik akuuffigisinnaasaannik oqaluttuunneqartalissapput, oqarpoq KNR-ip Piorsaaviani pisortaq Niels Pavia Lynge.
Aallakaatitassiaq siullermik sisamanngorpat oktober-ip 3-ani nal 20:30 aallakaatinneqassaaq, ukiaaneranilu sisamanngornerit allortarlugu aallakaatinneqartassalluni.