DR-ip aallakaatitassiaa "Flugten fra Grønland" - "Kalaallit Nunaannit qimarranneq" unnugu aallakaatissallugu KNR-ip pilersaarutigigaluarpaa. Siullermik qallunaatut nalunaaqutaq 18.30, kalaallisullu nalunaaqutaq 19.55, aallakaatitarmi nutserniarlugu KNR-ip pereeraluarmagu.
Qinersinissalli ullumikkut nalunaarutigineqarnera pissutigalugu aallakaatitap unnugu aallakaatinneqarnissaa DR-ip peertariaqarsimavaa, tamannalu KNR-imut sunniuteqarpoq, tassami DR-kkut suli aallakaatinneqanngitsut KNR-imi aallakaateqqusaanngimmata. Periarfissarli siulleq aallakaatineqarumaarpoq, aallakaatitarmi Kalaallit Nunaanni innuttaasunut soqutiginaateqarluarmat.
Aallakaatitap takutinnissaa KNR-ip qilanaarisimagaluarpaa, Itisiliinermi aqagu sisamanngornermi ilaatigut aamma oqallitsitsinertalissamaaraluarlugu. Kisianni tassa utaqqigallartariaqassaagut, "Kalaallit Nunaannit qimarranneq" periarfissaq siulleq atorlugu aallakaatinneqarumaarpoq.
Taarsiullugu Itisiliineq unnugu aallakaatinneqarumaarpoq, Itisiliinermilu aaqqissuisut Folketingimut qinersinissaq sammineqassaaq. Itisiliineq kalaallisut aallakaatinneqassaaq nalunaaqutaq 19.55.