KNR Sulisoqarnermut Aningaasaqarnermullu pisortassaminik atorfinitsitsivoq

Anna Tele Post Greenlandimi allattaanertut atorfimmeersuuvoq kulturikkullu illorsuarmi Katuami ukiuni arlalinni Sulisoqarnermut Aningaasaqarnermullu pisortaasimalluni.

Anna Heilmannip suliassaasa annertuut ilagissavaat KNR-imut nutaamik periusissamik suliaqarnissaq - suliaq aallartinneqaqqammersoq, KNR-ip pisortaanera Søren Lennert Mortensen tusagassiorfinnut nalunaaruteqarluni taama allappoq.

Anna Heilmann apriilip aallaqqaataani atorfininnermini KNR-imi pisortaqatigiinnut ilanngutissaaq.

KNR- ip aningaasaqarnermut sulisoqarnermullu allaffeqarfii suliffeqarfiup avataani suliffeqarfinnut suliakkiissutigineqarsimapput, Birgit Gedionsenimut Suliplusimeersumut Ole Kielmannimullu Plusimeersumut. Anna Heilmannip atorfinitsinneqarneratigut taakkuninnga suleqateqarneq unitsinneqassaaq.