Tusagassiutitigut nalunaarut KNR nutaarsiassiisarnerminik ikililereqqittariaqarpoq
Radioavisimi sulisut amigaateqarnerannik tamanna tunngaveqarpoq. Tusagassiortunik kalaallinik radioavisi sisamanik amigaateqarpoq, tusagassiortunillu amigaateqarneq nutaarsiassanik nutaarsiassiivinnut nutaarsiassiivinnut aamma sunniuteqarpoq, tassami nutaarsiassaqartitsivimmi sulisut nikititeqqinneqartariaqarmata.
Tamanna qaammatini tulliuttuni marlunni ullup qeqqaanut radioaviisi unnukkut nal. 18 allakaateqqinneqartalernissaanik, nittartakkakkut nutaarsiassat saqqummertut ikilineqarnissaannik kiisalu Qanorooq sivikinnerusumik aallakaatitsisarnissaanik kinguneqarpoq.
Akissarsiat appasittut sulisunullu inissaqartitsinnginneq
Innuttaasunut kiffartuussilluni nutaarsiassassaqartitsisoq sulisunik amigaateqarneq peqqutigalugu nutaarsiassanik aatsaat ikilisaalinngilaq. Radioaviisi ukiormanna februarimi unnukkut sivikillineqarpoq.
- Suli aammaarluta sulisoqarnikkut pissutsit aaqqiiviginiarlugit iliuuseqassaagut nalunngikkaluarlugu akissarsiat appasinneri peqqutigalugit tunuartertoqartartoq aammalu Namminersorlutik Oqartussat aqqutigalugit sulisunut inissianik atorfinittunut attartortitsisariaqartarnerput apeqqutaasartoq. Arlaleriarluta tusagassiortunik ilinniarsimasunik sineriammeersunik atorfinitsitsiniartaraluarpugut, taakkuli inissianik attartorsinnaanissartik kissaatigisarpaat, Annga Lynge oqarpoq.
Ilisimavarput periarfissaasoq Namminersortut Oqartussani tusagassiilluni paasissutissiisartut Namminersorlutik Oqartussat inissiaataannik attartortuunertik KNR-imi sulilissagaluarunik inissiat attartukkatik annaanavianngikkaat attartuinnarsinnaagaallu, matumanili tunuarsimaarutigineqartarpoq qaammammut akissarsiat appangaatsiartussaaneri. Tusagassiinikkut paasissutissiisartoq qaammammut 2.225,25 kr.-inik tapeqarpoq aaqqissuisutullu akisussaaffeqaruni 3.000, 00 kr-inik tapeqartarluni.
Illumi sulisut tamarmik eqqorneqarput
Radioaviisimi tusagassiortunik sulisussaaleqineq peqqutigalugu KNR-mi radiokkut TV-kkullu oqallitsitsilluni aallakaatitassiortoq radioaviisimut nuutsinneqarnikuuvoq, oqallitsitsisarnerlu aallarteqqinniarlugu suliassaq KNR Radiomut maanna nuutsinneqartariaqarluni.
KNR-ip nutaarsiassaqartitsivia apriilimi 2022-mili tusagassiortunik kalaallinik amigaateqalerpoq, taamanerniillu nutaarsiassanik aallakaatitsisarnissaq piviusunngortinniarlugu sulisut immikkoortortat akornanni nikerartittarsimavai.
Paasissutissat sukumiinerusut pillugit pisortaq Annga Lynge saaffigineqarsinnaavoq, oqarasuaat 361500-imut sianernikkut imaluunnit e-mailikkut aly@knr.gl
