KNR nutaamik nutaarsiassat tunuliaqutaannik aallakaatitsisalerpoq
KNR-ikkut aallakaatitassiap nutaarsiassat tunuliaqutaattut isigineqarsinnaanera pissutigalugu Qanoruup kingorna aallakaatinneqartassaaq, nalunaaqutaq arfineq-pingasunut tanneq aqqanermut.
Isuma tusagassiortumit Jokum Nielsenimit, Pulaarfimmik aallartitsisumit aallakaatittaligassaq ullut 14-ikkaarlugit aallakaatinneqartassaaq, aallakaatitami nalunaaquttap affaanik sivisussusilimmi inuiaqatigiinni pisut sammineqartassallutik.
Paasiniaanerit tamakkiisumik illua’tungeriissitsinikkut ingerlanneqartassapput. Sisamanngornermi marsip ulluisa 25-ianni aallakaatinneqartussami oqallitsinneqassapput politikkimut tunngasunik naliliisartoq cand.scient.pol. Jakob Janussen inuiaqatigiilerinermillu ilinniakkaminik naammassinneqqammersoq cand.mag. Axel Jeremiassen.
KNR TV-kkut aallakaatitami Isumami pissaanerup pingasunngorlugu avinneqarsimanerata tamat oqartussaanerannut ullumikkut sunniutaa eqqartorneqassaaq. Ministeritut akisussaassuseqanerup killingi erseqqissarneqartariaqartut oqallinnermi paasineqarpoq.