KNR isorineqarlunilu nersualaarneqarpoq
Innuttaasunik kiffartuusivimmi KNR-imi pisortap misissuineq iluarisimaarpaa.
- Misissuiffigineqarneq pitsaajuaannarpoq. Isumaqarpunga misissuineq
peqqissaarussaallunilu tatiginartuusoq, unammilligassattalu amerlanersaannik
uppernarsaaffiusoq. Pitsanngorsaanissamut inissaqarluarpoq. Epinionip kaammattuutigisai tusarnaassavagut iliuuseqarfigalugillu, aamma suliffeqarfimmi avammullu tatiginassuseq iluarsineqassaaq, Ivalo Egede naqissusiivoq.
KNR-imi ukiorpassuarni aningaasaqarnikkut annertuunik ajornartorsiuteqarsimanera
nalunaarusiami tikkuartorneqarpoq. KNR-ip tamatuminnga siunissami pitsaanerusumik
ingerlatsilernissaa Epinionimit kaammattuutigineqarpoq. Aallakaatittakkatigut
aallakaatissianut ataasiakkaanut tunngatillugu akiviusunik naatsorsuisoqartalernissaa ilaatigut kaammattuutigineqarpoq. Siulersuisut pisortaqatigiillu aningaasaqarnikkut pitsaanerusumik aqutsinissaq qulakkeerniarlugu suliniutinik arlalinnik aallartisaareerput, taakkulu arlaannaanulluunniit attuumanngitsumik nalunaarusiami kaammattuutigineqartunut amerlasuutigut naapertuupput. Teknologiimilli nutaamik aningaasalersuinissaq suliassaavoq tigussaasoq iluarsiniarneqartussaq.
Atuisut isumaannik misissuinerup takutippaa nuna tamakkerlugu innuttaasut
amerlasuupilussuit aallakaatitassiorfiup inuiaqatigiinni kalaallini nutaarsiassanik
tunuliaqutsiinernillu tunniuttagaanik atuisuusut.
Aamma Savalimmiuni Kringvarpimut
nallersuussineq, piginnittut aningaasanik tunniussaminnut naatsorsuutigisaminnik
pissarsisarnerannik takutitsivoq.
- Savalimmiuni tunniunneqartartut assinginik tunniussaqarpugut. Tamanna paasissallugu
pitsaasuuvoq. Tamanna aamma killiliussat atugassarititaasut iluanni tunniussinnaasatsitut
naatsorsuutigineqartut tulluarsarnissaannut atorneqarsinnaavoq. Nammineq isumarpunga ingerlallualerumaartugut. Aallakaatitassiorfimmi sulisunut, Nunatsinnilu innuttaasunut iluaqutaasussamik, Ivalo Egede naggasiivoq.
