KNR-ip suliffeqarfittut imminut ingerlatittutut aaqqissugaalernissaa ujartorpaat
Naalakkersuisut Radioqarneq tv-qarnerlu pillugit Inatsisartut inatsisissaattut siunnersuutaata tusarniaassutiginerata januaarip arfernanni naammassineqareersorlu, Inatsisartuni illuatungiliuttut, Tusagassiuinermilu Sulisut Peqatigiiffiat taama isumaqarput:
Naalakkersuisut Radioqarneq tv-qarnerlu pillugit inatsisissatut siunnersuutaata, Inatsisartut upernaakkut ataatsimiinneranni, marsip 18-anni aallartittussami saqqummiunneqarumaartoq ilimagineqarpoq.
Inatsisissatut siunnersuutip pingaarnerusukkut siunertaraa radioqarnerup tv-qarnerullu iluanni pisariaqartinneqalersimasunut inatsisit atuuttut naleqqussarneqarnissaat.
Innuttaasut nalinginnaasumik soqutigisaattut inuiaqatigiinnut paasissutissiisarnerit aallakaatinneqartarnerinik apeqqut siunnersuutimi aamma nalimmassarniarneqarpoq, inatsisillu aappaagu januaarip aallaqqaataani atuutilersinneqarsinnaanissaa Naalakkersuisut naatsorsuutigaat.
KNR-ip suliffeqarfittut imminut ingerlatittutut inissisimalernissaa pissusissamisoornerusoq, illuatungiliuttut siuttuata Kuupik V. Kleistip, Inuit Ataqatigiinneersup, oqaatigaa, siulersuisullu politikkikkut attuumassuteqanngitsumik sulisinnaanissaat ujartorlugu:
- KNR-i tusagassiorfiuvoq, tunisassiorfiunngilaq. Taamaattumik aqunneqarneranut piumasaqaatit assigiinngitsut kiffaanngissuseqarluni Naalakkersuinikkut pituttorsimanani aammalu tamatigoortuulluni ingerlatsinissaq taakku pingaarnerpaajupput, Kuupik V. Kleist oqarpoq.
KNR-illi siulersuisuini ilaasortat massakkutut arfineq-marluujunnaarlutik, tallimaannanngortinneqarnissaat, Kultureqarnermut, taamalu aamma KNR-imut, Naalakkersuisup Nick Nielsenip siunnersuutigaa, siulersuisunilu tallimaasuni sisamat Naalakkersuisunit toqqarneqartarnissaat aamma siunnersuutigalugu.
- Sisamat Naalakkersuisut toqqartassavaat, taava ataaseq KNR-imi sulisunit toqqarneqartassaaq, Kultureqarnermut Naalakkersuisoq Nick Nielsen, oqarpoq.
Naalakkersuisulli siunnersuutaat Tusagassiornermi Sulisut Peqatigiiffianni siulittaasup Mariia Simonsenip aamma apeqquserpaa:
- Ernumanaateqarsinnaavoq ugguuna aarlerigineqarsinnaammat immaqa kinaassusersiorluni siulersuisunik inuttaliisinnaaneq. Taanna aarlerinarsinnaajuaannarpoq, kisianni soorunami tatigisariaqarpavut Naalakkersuisut, Tusagassiuinermi Sulisut Peqatigiiffiata, TP-p, siulittaasua Mariia Simonsen, oqarpoq.
