KNR-ip qinersinissamik annertuumik sammisaqarnissaa Qulaarpaami aallarnerneqassaaq
![](/sites/default/files/styles/image_934x467/public/article_images/knr_18_2.jpg?itok=5s7_0dZy)
- Qinersisartut paasinartumik tunngaveqartumik qinersiartorsinnaanissaat anguniarlugu, qineqqusaarnerup pitsaasumik, isornartorsiuisinnaassuseqartumik naapertuilluartumillu malittarinissaanut KNR, innuttaasunik kiffartuussivittut, immikkut ittumik akisussaaffeqarpoq.
- Akisussaaffillu taanna aallakaatitassiamik annertuumik pilersitsinitsigut naammassinasoraarput, oqallitsitsinermillu aallakaatitassioriaatsit nutaat pisoqqallu akuleriissillugit aallakaatitassiassagut innuttaasut qilanaarisinnaalereerpaat, KNR-ip pisortaanera, Søren Lennert Mortensen, taama oqarpoq.
Nutaat ilisarisimaneqareersullu
Qineqqusaarneq sisamanngorpat aallartinneqassaaq, KNR-immi immikkut qaqilerilluni aallakaatiassiaata nutaap, Qulaarpaa, aallakaatitseqqaarnermini ullut ilungersunartorsiorfiusut tallimat, Naalakkersuisut siulittaasuata tunuarneranik qinersinerullu suaarutigineqarneranik kinguneqartut samminiarpai.
Qanorpiaruna pisoqartoq, aamma sooq taama ajortigisumik pisoqarpa, Nunatsinnut qanoq kinguneqassava aamma sutigut ilinniarfigisinnaassavarput? Nunatsinni partiit siuttuisa aammalu immikkut ilisimasalittut aggersarneqartut nalunaaquttap-akunnerani ataatsimi tamanna sammissavaat, siullermik kalaallisut kingornalu danskisut. Sisamanngormat nal. 19.30 aamma 20.30 isiginnaaqataagit.
Qulaarpaa aallakaatitseqqaarnermi kingorna qineqqusaarnerup sinnerani unikkallassaaq, qinersinissaq KNR-imi immikkut sammineqartussaassammat.