KNR-ip naliilisartua: akileraarutinik iluarsaanissaq pisariaqarpoq

"Nunatta Karsia aningaasassaaleqivoq". Taamaammat akileraartarneq pillugu ataatsimiititaliornissamik partiit Inatsisartunut qinersinnginnermi isumaqatigiissinnaammata, iluarisimaarpara, taamaalillunimi aningaasaqarneq aqunneqalersinnaavoq. KNR-ip qinersinermi naliliisartua, cand. scient. pol. Jakob Janussen, taama isumaqarpoq.
Allattoq Jens Thorin
maajip 15-at 2009 15:39

- Politikerit paasivaat, Nunatta Karsia ukiut tamaasa annertuumik amigartoruteqarluni soorunami ingerlaannarsinnaanngitsoq. Taamaakkaluarpammi aningaasat, pissutsinut ajornerusunut sillimmataasinnaasut, nungussinnaammata. Tassalu kingusinaartigani pilersitsinissaq pitsaaneruvoq sunngitsuuinnermit, KNR-ip naliliisartua oqarpoq.

Jakob Janussen-ip uani eqqarsaatigaa, Nunatta Karsia amigartooruteqangaatsiarmat. Tassami 2008-mi 300 millioni koruuninik amigartoornissaq missingersuutigineqarpoq. Kisianni marsiuinnartoq paasinarsivoq, Nunatta Karsiata amigartoorutai 389,7 millioner koruuniussasut. 2007-mi amigartoorutit 267 millioni koruuniusut ilanngukkaanni, ukiuni kingullerni marlunni amigartoorutit 656,7 millioni koruuniupput.

Kisianni akileraartarnermik iluarsaaqqinnissami pingaarluinnarpoq, akileraartarneq pillugu ataatsimiititaliarsuarmut pilersinneqartussamut suliakkiutip ersarissuunissaa, Jakob Janussen nassuiaavoq.

- Isumaqarpunga isumalioqatigiissitanik pilersitsisoqassappat pingaartorujussuusoq, suliassiisut erseqqissumik oqaatigissagaat, suut suliassamut killiliunneqassanersut. Aamma tassunga ilanngullugu eqqarsaatigisariaqarpoq, aningaasaliissutaasartut allat, assersuutigalugu ineqarnermut tapiissutaasartut aammalu isumaginninnermut aningaasaliissutaasartut allat kiisalu nammineerlutik ingerlatsisut nalikillisaasarnerannut malittarisassat ilanngullugit isiginartariaqartut, Jakob Janussen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq