KNR-ip aningaasaqarnera ilungersunarpoq

KNR-ip nammineq aningaasaatitigut ajornartorsiuteqarnera kukkunersiuisunit ukiut tulleriit aappassaanni oqaatigineqarpoq, namminerlu aningaasaatinik  pilersitseqqinnissaq ilimanaateqarpallaanngitsoq, piffissap ingerlanerani nunatta karsia KNR-imut immikkut ittumik tapiissuteqanngitppat.

- Aningaasaqarneq ernummatigaarput. Akiitsutigut nammagassat aningaasaliissuteqaqqinnissamillu pisariaqartitsineq unammilligassarujussuuvoq. KNR-ip suliassaq nammineerluni naammassisinnaanngilaa, siulersuisullu neriuutigaat avataanit aningaasaliissuteqartoqassasoq.  Tamanna siunnersuutigineqartutut allanngortitsilluni aningaasaateqarfimmik inuussutissarsiummik ingerlatsisumik pilersitsinikkut pisinnaagaluarpoq, naak taamatut allanngortitsineq immini KNR-imi ingerlatsinermi aningaasaqarnermut pitsanngoriaataassanngikkaluartoq, siulersuisut siulittaasuat Peter Jensen oqarpoq.