KNR-ip ataatsimiittarfimmit aallakaatitseqqittalernissaa piumasarineqartoq

KNR-ip aallakaatitseriaaseq nutaaq atorunnaarlugu Inatsisartut ataatsimiinneri radiukkut toqqaannartumik aallakaateqqittalertariaqarpai. Inatsisartut siulittaasoqarfia taama isumaqarpoq. 

Inatsisartut ataatsimiittarneri, KNR-ip aalajangiiffigisaanik, radiukkut toqqaannartumik siorna apriilimiit aallakaatinneqartarunnaarput.

Siulittaasoqarfik Inatsisartut aalajangiiffigisassaattut siunnersuuteqarpoq, KNR radiukkut Inatsisartuniit toqqaannartumik aallakaatitsisaleqqinnissaanik pisussaaffilerniarlugu.

Tassalu inatsisiliornikkut KNR aqunniarneqarpoq.

AAMMA ATUARUK Inatsisartut siusinnerusukkut katersuuttarnissaat uissuummissutaavoq

- Innuttaasut qinikkat aqqutigalugit oqartussaaqataanerat tunngavigalugu naalakkersuinikkut ingerlatseriaatsitsinnut inatsisiliortussatut qinikkat oqallinnerisa malinnaavigisinnaanissaannut innuttaasut periarfissaqarnissaat aallaaviulluinnarpoq, siulittaasoqarfik tunngavilersuummini allappoq.

KNR-imi pisortap Karl Henrik Simonsenip siunnersuut ernumanartoqartippaa: 

- Aalajangerniarpaat piffissani aalajangersimasuni aallakaatitsisalissasugut. Tassa imaappoq, KNR-ip nammineq siunissami aalajangersinnaanngilaa. Qanoq issanersoq qulaaninngaanniit naalakkiutiginiarneqarnera eqqunngitsutut isigaara.

KNR-ip sunik aallakaatitsisassaneranut politikerit akuliunniarnerannut Danskit tusagassiortuisa peqatigiiffianni siulittaasoq aamma isumaqataanngilaq.

- Taamaasillutik akulerutinnginnissamik isuma qimakkiartuaassavaat. Akuleruttussaatitaannginnermi tassaavoq tusagassiuutinik kiffaanngissuseqartitsisoq, kiffaanngissuseqarnerlu tamat oqartussaaqataanerannut tunngaviuvoq. Taannalu akuleruffigisussaanngilaat, siulittaasoq Lars Werge oqarpoq.

Naak kiffartuussinissamik isumaqatigiissummik politikerit atsiugaqareeraluarlutik, KNR-ip suleriaasianik allannguiniarnerat ajuusaarnartoq, innuttaasunik kiffartuussineq pillugu immikkut ilisimasalik isumaqarpoq.

Politikerilli nutaamik inatsiliornikkut killissarititaasut allanngussappatigit, KNR-ip tamanna susinnaanngilaa.

- Inatsisartut, Naalakkersuisut naalakkersuisoqarfiillu Inatsisartuni amerlanerussuteqarnertik tunulequtaralugu periarfissaqarput pisinnaatitaaffeqarlutillu atugassarititaasunik allannguinissaminnut, Roskildep universitetianeersoq Michael Bruun Andersen oqarpoq.

Inatsisartut siulittaasuat, Lars-Emil Johansen kultureqarnermullu naalakkersuisoq Doris Jakobsen suliaq pillugu oqaaseqarusunngillat.