KNR-imi ussassaarutit ingerlaannassapput

Naalakkersuisut aamma partiit Siumut, Atassut Demokraatillu "Tusagassiuutit nukittuut aamma inuiaqatigiit nukittuut" pillugit 2015-imut aningaasanut inatsimmi isumaqatigiissummut ilassutissatut maanna isumaqatigiissuteqarput.

Aappaagumut 2016-imut isumaqatigiissut timitalerniarlugu Naalakkersuisut KNR-ip pilerisaarutinik aallakaatitsisinnaanermut periarfissaanut inatsisinut allannguutissatut siunnersuusiorput.

Naalakkersuisut inatsimmut allannguutissamik nutaamik, susassaqartut naapertuutinngitsutut tikkuarsimasaat ilanngullugit siunnersuusiussasut, Naalakkersuisut nittartagaanni atuarneqarsinnaavoq.

Susassaqartut tusarniaasoqarneranut atatillugu akissutaat, Kulturimut Naalakkersuisup Nivi Olsenip nuaannaarutigai:

- Tusagassiornermik suliaqartut tusarniaanermut akissutaat peqqissaartumik suliarineqarsimasut qujassutigaakka, nuannaarutigaaralu Radiomik aamma TV-mik ingerlatsineq pillugu Inatsisartut inatsisaat nangillugu suliarisinnaagatsigu, taamaalillutalu allannguutissatut siunnersuutissap suliarilluarnissaanut periarfissaqalerluta. Inatsiseqalerniassagatta tamatta piginnittutut misigiffigisatsinnik naammagisimaakkatsinnillu, Kulturimut Naalakkersuisoq Nivi Olsen naggasiilluni ilaatigut taama oqarpoq.