KNR-imi suleqat Ane Sofie Nielsen toqukkut qimaguppoq

Kalaallit Nunaata Radioani ukiuni kingullerni 27-ni suleqataasimasoq, Ane Sofie Nielsen, Anso, katinngikkallarami Egedemik naggateqartoq, Ålborgip napparsimmaviani sivisuatsiaamik napparsimareerluni ippassaq toquvoq, 65-inik ukioqarluni.
aggustip 21-at 2009 09:22

Anso 1960-ikkunni allaffimmiutut Ikastimi ilinniarpoq, naammassigamilu KGH-mi allaffimmi suleqqaariarluni 1971-imiit Timersoqatigiit Kattuffiani allatsitut sulilerluni. 1976-imi Kalaallit Nunaata Radioani sulilerpoq, aallaqqaammut allatsitut, 1991-imiillu aallakaatitassanik pilersaarusiornermi allatsitut ingerlaqqilluni. Anso ukiuni kingullerni marlunni KNR-Radiop båndiisiviani suleqataavoq.

Anso qiimasuullunilu quianartunik nuannarisaqartuugami suliffimmini ilakkuminartutut suliaminullu tunniusimalluartutut misigineqartarpoq. Minnerunngitsumik isiginagu maskiinamik allallaqqilluinnartuunera sullinneqartunit maluginiarneqartarpoq.

Ansop uiatalu Poulip angallammik asiarneq nuannarilluinnartuuaat, pingaartumik Nuup ungasinngisaani illuaqqaminnukartuartarlutik.

Ansop timaata Nuuliaallugu ilineqarumaarnissaa eqqarsaataasoq qanigisaannit oqaatigineqarpoq.

Ansop qimatarai uini Poul Nielsen, ernitik pingasut ernuttatillu sisamat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq