KNR-imi pisortaaneq tunuassaaq
- Tunuarniuteqarnisara nammineq aalajangerpara, Lars Lennert-Sandgreen oqarpoq soraarniuteqarninilu ima tunngavilersorlugu:
- Ukiut arfinillit KNR-imi pisortaanera uannut inuttut nuannerlutillu pissarsiffiulluarsimaqaat, aammali uannut piumaffiginnissimaqalutik unamminartuusimaqalutillu. Aallakaatitassiornermi nutaarsiassiinermilu atukkat pissutsillu aningaasaqarniarnermut sanilliullugit oqitsuinnaasimanngillat, KNR-imut sinaakkiunneqartartut piumasaqaatillu erqaassagaanni. Periarfissarpassuugaluarpummi atorluarneqarsinnaagaluartut uggornartumik piviusunngortinneqarsinnaasimanngitsut, aningaasaqarnikkut atugassarititaasut peqqutigalugit, Lars Lennert-Sandgreen oqarpoq.
- Isumaga malillugu pisortaanertut atorfik ukiut sisamat-tallimallu akornanni sivisussuseqartariaqarpoq. Aamma nutaamik atorfissarsiornissara qilanaarivara, pisortaaneq sulisunik ullumi katersortitsinermini taama oqarpoq.
Aalajangerniarnerli ajornarsimasoq KNR-ip pisortaanera Lars Lennert-Sandgreen radioavisimut oqarpoq:
- Tassami, suliffik taama qanimut pisortaaffigereerlugu aamma imaannaanngitsorujussuuvoq uangaalluni. Kiffartuussineq, sullissineq qaammarsaanerlugu, Public Service, imartoorujussuugami, ulluinnarni arfineq-pingasuniit sisamanut suliffiinnaasimanngilaq, Lars Lennert-Sandgreen nassuiaavoq.
KNR-imi pisortatut sulineq annertoorujussuarmik inuttut imminut aamma sunniuteqarnerarpaa.
- Sunniuteqarpoq piumaffiginnittorujussuullunilu, taamaattumik suliffik unganartussaavoq, soorunami, kisianni tassa ingerlaqqittariaqaratta, taamatut uanga nammineq aalajangerpunga. Aalajangernera aallaavigalugu KNR-ip ingerlalluarnissaa soorunami soqutigisariuaannartussaavara, oqarpoq.
Piffissanngorsoraa 48-inik ukioqarallartilluni allamik misilittagaqarnissani.
- Kingumut qiviassaguma annertuunik misilittagaqarpunga, soorlu ukiut qulit Royal Greenlandimiissivunga, assut misilittagaqarfigisannik aammaali KNR-imi misilittakkakka initoqaat, Lars Lennert-Sandgreen oqarpoq.
KNR-ip siulersuisui pisortatut soraarnissaanut aalajangiisooqataasimanerlutik? Aperaarput.
- Taamaanngilaq, uanga nammineq ataatsimut nalileereerlunga tunuarniarlunga aalajangersimavunga.
Lars Lennert-Sandgreenimut tullinnguuppoq allamik suliffissarsiornissaq.
KNR-imi ukiortaap tungaanut sulinera attassinnarlugu, pisortamik nutaamik ivertitsinissamut sapinngisara tamaat peqataassaanga. Taava tassanngaanniit nalunarumaanngilaq qanoq pisoqarumaarnersoq, Lars Lennert-Sandgreen radioavisimut oqarpoq.
KNR-ip siulersuisui sinnerlugit siulittaasoq Frederik Lund ualiartoq nalunaarpoq, siulersuisut pisortaanermik suleqateqarnerat ajunngitsuusimasoq, suliunnaarniarlunilu aalajangernera ataqqillugu tusaatissatut tigugitsik.
