KNR KNR-imi periaaseq nutaaq allannguingaatsiarniartoq

Sapaatip akunnera kingulleq qullersaqarfiup nutaanik ingerlariaatseqalernissamut saqqiummiussaat KNR-imi siulersuisunit akuerineqarpoq.
juulip 07-at 2014 12:00

KNR siuariaqqinnissaminut Kalaallit Nunaannilu ataatsimooortarfinni annerpaanngornissaminut kissaateqarpoq. Aallakaatitassiat amerlatsikkusuppagut pitsaanerutikkusuppagut, isiginnaartartut naalaartartullu qanimut oqaloqatigerusuppagut. Isummersortikkusuppugut unammillertillutalu aallakaatitassiat suli pitsaaliartornissaat anguniarlugu.

 

Aningaasaqarneq anguniakkat assigisaannik qaffanneqanngikkaluartoq, KNR-imi angusariniakkat inissipput tamattalu anguniarnissaanut aallussissaagut.

 

KNR-ip suliassai unammillernartut arlaliusut, aallakaatitassianut allannguinissamut aallaviupput. Allanngortoqanngippat isiginnaartartut naalaartartullu siunissami TV-kkut radiokkullu kanalinut allanut qimarratilissapput, tamannalu inuiaqatigiinnut kiffartuussinertut najoqqutassamut artukkiissalluni.

 

KNR nutaarsiassalerisuni tusagassiuutini siuttoorusuppoq, siumoortumillu Kalaallit Nunaanni inuiaqatigiit annermik nuannersortai nuanniitsortaalu erseqqissarusuppai. KNR sullitani qanimut attaveqarfigerusuppai, inuiaqatigiinnut ataatsimoortitsissaaq pissusissamisoortumillu naapittarfiussalluni. KNR suli annertunermillu tusagassiornikkut apeqqusersuissapput, politikerinut inuiaqatigiinnut sullissisunut sullissiviinnullu nakkutilliisuussapput. 

 

KNR-imi immikkut suliassarissarivarput nutaarsiassanik soqutiginartunillu ingerlateqqiinikkut, piorsarsimassusikkut, aliikkusersuinikkut il. il. illoqarfigisaq Kalaallit Nunaallu najoqqutaralugit siuarsaanissaq. Kalaallit Nunaata tunngavii aammalu oqaluttuarisaanerput immikkuullarissoq, inooriaaseq, quiasaarinerit, kaffillerneq, nunarpullu immikkuullarequitai tamaasa, tamatta nuannarisagut, tunngavigalugit pilersuineq ingerlassaaq suleriaaserlu aallaveqassaaq.

 

KNR ineriartorusuppoq maannalu suliniutinik nutaanik arlalinnik pilersaarusiorpugut. Taakkualu tunngavigalugit ullumikkut unammillertini radiokkut, TV-kkut, internetikkut inuillu tamat oqallittarfiini amerlaqisuni KNR kajuminartunngussaaq.

 

Ukiami aggersumi suliniutinik tigussaasunik KNR neqerooruteqassaaq. Nutaarsiassanik ingerlatitseqqeriaaserput annertusissavarput, soqutiginartunillu, aliikkusersuisunik journalistikkikkullu itinerusunik aaallakaatitassianik pilersitsissaagut.

 

Radiokkuttaaq aallakaatittakkagut annertusissapput, ilaatigut journalistikkikkut suliat, inuaqatigiinnullu attuumassutillit inuusuttunullu aallakaatitassiat amerlillugit.

 

Aallakaatitassiat nutaat qanimut aningaasanik aqutsineq, ilaatigullu aallakaatitassiat tamaanimiunik nioqqutissiortunik suliaritinnerani, tusagassiutinut KNR-mullu inatsisit nutaat naapertorlugit niuernerup tungaatigut periarfissarsiornikkut aningaasalerneqassapput.

 

Naalartartunik isiginnaartartunillu misissueqqissaarinerput nutaanerpaaq inuit tamapajaamik KNR isiginnaartaraat naalaartaraallu takutippaa. Unammillernartoq tassaavoq tamanna attatiinnarnissaa – minnerunngitsumik inuusuttut digitalitigut nutaarsiassanik aliikkusersuinernullu inersimasunut sanilliullugu allaanermik malinnaariaasillit. 

 

Ataatsimut isigalugu KNR-mi ukiaq aggertussaq tamatsinnut unammillernartuussaaq, qularinngilarpullu suliat nutaat naalaartunit tusarnaartunillu tigulluarneqarnissaat, tamattalu aallakaateqqitat ikiliniarneri qilaanaarutigisinnaavarput.

 

Siulersuisut sinnerlugit,

Hans Peter Poulsen                                                                             
Siulittaasoq  

 

Oqarasuaat 482473