KNR-imi nutaarsiassaqartitsivimmi pisortanngorallartut

KNR-imi pisortaq Ivalo Egede nutaarsiassaqartitsinermut pisortaagallarunnaarpoq. KNR suli nutaarsiassaqartitsinermut pisortamik pissarsiorpoq, atorfinittussalli pissarsiarinissaata tungaanut KNR-imi Nutaarsiassani suliassanik aqutsineq Qanoruumi aaqqissuisumut Jokum Nielsenimut kiisalu Radioaviisimi aaqqissuisuugallartumut Mikkel Bjarnø Lundimut maanna avinneqarpoq.
apriilip 14-at 2009 14:56

- Jukku Mikkelilu nutaarsiassaqartitsinermi pisortap piukkunnartup pissarsiarinissaata tungaanut suliassanik isumaginnissinnaanerannut assorsuaq tatigaakka. Tamatumunnga peqatigitillugu aamma uanga KNR-imut tamarmut pisortatut suliassama 100 procentimik eqqarsaatiginissaat pisariaqartippara, Ivalo Egede oqarpoq nangillunilu:

- Nutaarsiassaqartitsinermut pisortap piukkunnartup atorfinitsinnissaa pingaartuuvoq. Atorfik taanna pingaaruteqarpoq, uatsinnuinnaanngitsoq, aammali Kalaallit Nunaannut tamarmut, taamaattumik nukinginngilagut, inulli piukkunnartoq taanna sivisunngitsumik utaqqissallugu neriuutigaarput. Taama pisoqalersinnagu qularutiginngilara tamanna pitsaanerpaamik aaqqiissutaasoq, Ivalo Egede oqarpoq.

Atorfimmik inuttassarsiuineq KNR-ip nutaarsiassaqartitsinermut pisortamik inuttassarsiugaa knr.gl-imi takuneqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq