KNR-imi aallakaatitassiat qineqqusaarnerup nalaani unitsikkallarneqassapput

Oqallinnermik aallakaatitassiat Kassoq aamma Isummersorfik kiisalu Qiviarfik unitsikkallarneqassapput

- Nunatsinni qinersisoqartussanngornerani KNR-ip suliassai aamma allanngortinneqassapput. Qinersinissaq pillugu aallakaatitassiortoqassaaq aamma qinersinermut atatillugu oqallitsitsisoqassaaq, innuttaasut partiit qinigassanngortitaqartut qingassanngortittullu isumaannik pilersaarutaannillu sukumiisumik paasisarnissaat anguniarlugu. Taamaammat qineqqusaarneq pillugu suliassamut nukivut katersussavagut, nutaarsiassaqartitsinermi pisortaq Mikkel Bjarnø Lund taama oqarpoq.

Taamaammat oqallinnermik aallakaatitassiat Kassoq aamma Isummersorfik ullumikkumit taamaatiinnarneqarput, Qiviarfillu qinersinissaq sioqqullugu KNR-ip ataasinngorpat naggammik aallakaatissavaa.

- Qinersinermut atatillugu oqallitsitsinerit pillugit pilersaarut pissanganartoq suliaralugu naammassileruttorparput, taannalu ileqquusoq malillugu nunatsinni sumiiffinni assigiinngitsuni qinersisartunik ataatsimiititsinernik, sammisaq tunngavigalugu oqallitsitsinernik allarpassuarnillu imaqassaaq. Aliikkutaalluarluni, qaammarsaataallunilu imaqarluarnissaa qularnanngilaq, nutaarsiassaqartitsinermi pisortaq taama oqarpoq.

Ulloq qinersiffissaq sapaatit akunnerata tulliani inissinneqariarpat pilersaarut sukumiinerusoq KNR-imit saqqummiunneqarumaarpoq.