KNR: Erinarsorneq peqqinnartuuvoq
- Erinarsoqatigiinnik pilersitsinitsinni pissutaanerpaavoq, kalaallit erinarsuutaasa aamma erinniaasa piujuaannarnissaat maani KNR-imi aallunnerulerniaratsigu, Martin Chemnitz oqarpoq.
KNR nammineq erinarsoqatigiivi, organist Knud Petersenimit siulersorneqartut 1970-ikkut aallartinneranni taamaatipput, tamassumali siornagut, 1950-ikkut qiteqqunnerani Nuummi meeqqat nivissat erinarsoqatigiit pilersinneqarmata, Pauline Lumholt erinarsoqatigiinnut peqataavoq, taanna aperaara erinarsornerup meeqqat qanoq misigilersittarneraat, akivorlu:
- Nalunngilarput erinarsorneq qanoq tarnimut nukittorsaataatigisartoq, tamannalu meeqqat peqqinnerusumik inuuneqalernerannut aallarniutaalluarsinnaavoq. Tassami tarneq nukittooq pigigaanni inuuneq pisooq pigineqalersarpoq, Pauline Lumholt oqarpoq.
Nivissat 14-iniit 20-t angullugit ukiullit misilitsinnissaminnut periarfissinneqarput. KNR-ip Siuarsaanermut pisortaa, Martin Chemnitz oqarpoq, erinaginneq apeqqutaatinnagu kikkulluunniit tamarmik aggersarneqartut:
- Kikkulluunniit erinarsornermik soqutiginnittut qaaqquavut, soorunami erinarsorsinnaasut soqutiginerullutigik, taamaattorli pingaartinneruarput tunniusimaneq, taamaammat kikkulluunniit aggersarpavut, Martin Chemnitz oqarpoq.
