KNR allarpassuillu Unnuk Kulturisiorfik 2015-imut arfininngorpat unnukkut tikilluaqqusissapput
Nal. 19-ip 22-llu akornanni Issortarfimmut 1A-mukaannassaatit.
Nuummi sinerissamilu arfininngorpat unnukkut pisussarpassuaqarpoq.
Unnuk Kulturisiorfik 15-issaanik ingerlanneqarnissaanut pilersaarutit tamaasa uani takusinnaapput.
Nuummi suliffeqarfiit suliniaqatigiiffiillu immikkut ittumik sivisunerusumik ammassapput, nal. 18-imiillu 22-p tungaanut busserneq akeqassanngilaq.
Arctic Winter Games 2016 illoqarfik tamakkerlugu aamma saqqumissaaq, maskotti Kuluk Royal Arctic Linep umiarsuaataanut ilaalluni umiarsualivimmut tikissaaq, Kulullu illoqarfimmi aaqqissuussinernut assigiinngitsunut pulaareeruni Arctic Winter Gamesip naneruaa Katerittarfik Amisuni ikissavaa.
Atuagaateqarfimmi Rasmus Lyberth nal. 18-imit 22.30-mut tusarnaartitsissaaq.
Nuummi Air Greenlandimi hr. Skæg, hr. Vinter aamma Nuka Alice aliikkusersuissapput. Aammattaaq timmisartoq napparsimasunik angallassisartoq qulimiguulillu S-61 takusinnaavatit. Timmisartortartunngornissamillu, timmisartumi saqisutut timmisartunilluunniit iluarsaassisartutut takorluugaqaruit tamakku angunissaannut suut pisariaqarnersut paasisaqarfigisinnaavat.
Air Greenland Nanortalimmi Nuummilu aaqqissuussaqassaaq.
Atortorissaarutini elektroniskiusuni saffiugassat qanoq amerlatigisut atorneqartarnersut Pinngortitalerimmi paasisaqarfigisinnaavat. Aamma ujaqqamik alutornartumik uninngasuuteqaruit sumik akoqarneranik sutigullu immikkooruteqarneranik oqaluttuunneqarsinnaavutit.
Ilaqutariinnermut inatsisinillu atortitsinermut naalakkersuisumut aammalu avatangiisinut pinngortitamullu naalakkersuisoqarfimmut aamma pulaarsinnaavutit. Inatsisartoqarfik aamma ammassaaq, Inatsisartullu ataatsimiittarfiat takuniarneqarsinnaassalluni.
Inussavit ipaasaat nuutsillugit misiliguit - qunuginngikkukku
Politiit qimmimik qanoq sulisinneqartarnerat takutissavaat, aamma isertitsivimmut alakkartersinnaavutit kiisalu inussavit ipaasaat nuutsissinnaallugit.
Aammattaaq Nukissiorfiit alleqarfiannut, KNR-ip Issortarfimmiittup eqqaaniittumut, pulaartunut inaallaagassamik 5.000 koruunit nalinginut pinnattaassaqartitsisoqarnissaa eqqaasariaqarpoq.
Ilulissani ilaatigut Hotel Arctic, qalipaasartoqatigiit Seqineq, Kulturikkut illorsuaq Sermermiut aamma Ilulissat Haliat assigiinngitsorpassuarnik sammisassaqartitsillutik ammassapput.
Ilulissani pilersaarutit tamaasa uani takuneqarsinnaapput.
Maniitsumi katersugaasivimmut, TelePostimut Grønlandsbankimut kiisalu utoqqaat illuannut Neriusaamut pulaartoqarsinnaavoq. Maniitsumi pilersaarutit uani takukkit.
Qasigiannguani katersortarfimmi meeqqanut qititsitsisoqassaaq, Cross Fit og Audimi timigissartitsisoqassaaq Efterskolemilu rappimik, qitinnermik inuillu pinnguaataannik aliikkusersuisoqassalluni. Pilersaarutit tamaasa uani takuneqarsinnaapput.
Sinerissami sunik allanik pilersaaruteqartoqarnersoq uani takusinnaavat.
