KNR aasaanerani ikinnerusunik aallakaatitsisassaaq
KNR-ip aasaanerani aallakaatitsinera ullumikkut ataasinngornermi aallartippoq, KNR-illu nutaarsiassaqartitsiviata nutaarsiassanik aallakaatittagai aamma ikilineqarput.
Radioaviisit akunnikkuutaartumillu nutaarsiassat aasaanerani ulluinnarni ullaakkut arfineq-marlunit ullup qeqqa ilanngullugu aallakaatinneqartassapput.
Ualinerani akunnikkuutaartumik nutaarsiassaqartassanngilaq, nalunaaqutarli arfinermut kalaallisut radioaviiseqartassaaq danskisullu arfineq qaangerlugu tanneq marlunut. Taakku ullup qeqqaanerani radioaviisimeersuunerusunik nutaarsiassanillu kingullernik imaqartassapput.
Nalunaarutillit nukingernartut, soorlu Uummannaq eqqani pisut pillugit ulluni makkunani nalunaarutigineqartut, tigunerini ingerlaannaq soorunami tusarliunneqartassapput.
Sapaatit-akunnerata naanerani radioaviisit aasaanerani allannguuteqassanngillat.
Qanoruup aallakaatinneqartarnera aasaanerani aamma sivikillineqassaaq, tv-kkut nutaarsiassat minutsinik qulinik sivisussuseqartassallutik.
KNR aggustip 14-ianit nalinginnaasumik aallakaatitseqqittalissaaq.