KNR 16,7 mio. koruuninik pisariaqartitsivoq
Inatsisartut ullumi ataatsimiinnerini KNR-TV-p teknikkikkut piuminarsarneqarnissaata tapiiffigineqarnissaa oqaluuserineqarmat partiit amerlanerit tapersiipput.
- KNR-TV teknikkikkut piuminarsaavigineqarpat nunatta qeqqa kisiat pinnagu, avinngarusimanerusut ilaatigullu nunaqarfiit tusagaqarfigineqartalissagaluarput, inatsisartuni ilaatigut Siumumiit taama oqartoqarpoq.
Aammattaaq qulequttamik siunnersuuteqartuusup Ruth Heilmannip nunarsuarmi teknikkikkut ineriartupiloornerup nalaani inuunitsinni KNR-TV-mi teknikkikkut atortut qanganitsersimaneri uparuaavigai,.
Demokraatilli allaanerulaartumik piumasaqarput, taakku isumaqarput KNR-imi teknikkikkut piuminarsaanissaq suliffeqarfiup nammineq aningaasalersorsinnaasariaqaraa.
Kultureqarnermut naalakkersuisoq Doris Jakobsen oqarpoq KNR-ip teknikkikkut piuminarsarneqarnissaata aningaasaliivigineqarnissaa naalakkersuisunit soqutigineqartoq qanorlu ililluni aningaasaliisoqarsinnaanera maanna misissorneqartoq.
-Piffissami kingullermi KNR-p ataatsimeeqatigisarnerani paasitinnikuuagut paasissutissat assigiinngitsut amigaatigisimallutigit. Ilisimasakka naapertorlugit ukiuni kingullerni KNR-imiit tunniunneqartartut paasissutissat allanngorarsimapput. Taamaammat piumaffiginikuuagut erseqqissunik paasissutissanik tunniussaqaqqullugit, kisiannili akissuteqaatit suliarineqareernerata kingorna aatsaat paasissutissat uagutsinnut tunniunneqarput. Taakkulu ersersitsipput, 16,7 mio. koruuninik digitaliseeriinissanik aningaasanik pisariaqartitsisoqartoq, Doris Jakobsen oqarpoq. Taanna aperaarput, tamanna KNR-p nammineq akilissaneraa.
-Massakkorpiaq KNR periarfissaqarpoq atorsinnaanerminut 9,2 mio. koruuninik, taakkulu qaffanneqarnikuupput KNR degitaliseeriinissaanut pisariaqartitsineq naapertorlugu. Kisiannili naalakkersuisuni ilisimavarput, KNR-i aningaasaqarniarnikkut ajornartorsiuteqartoq, taamaammat tamannarpiaq tunngavigalugu periarfissanik allanik massakkut naalakkersuisuni misissuivugut aningaasaliisinnaanissatsinnut, Doris Jakobsen oqarpoq.
KNR-ip pisortaa Lars Lennert Sandgreen oqarpoq, KNR teknikkikkut piuminarsaavigineqarpat tamanna Qanoruup tallineranik kinguneqarsinnaasoq.
- 16 mio. koruunit sinnilaarlugit pisariaqartitsivugut tamakkulu nammineq aningaasalersorsinnaanngilagut, naatsorsueqqissaarsimavugut aningaasalersussagaluarutsigit erniat akiitsullu akilersorneri ukiumut 4 mio.-ngajaat akilersussagaluarpagut, ullumikkullu KNR-i taamaasiorsinnaanngilaq, KNR-ip pisortaa Lars Lennert Sandgreen oqarpoq
KNR-p siulersuisuisa tallimanngormat ataatsimiinnerminni ukiumoortumik naatsorsuutit ataatsimiissutigaat. KNR-ilu ukiut siuliini sinneqartoortaraluarluni maanna KNR amigartoorpoq, tassalu 2 mio. 653.000 koruunit amigartoorutigai.
Siulersuisuniillu taama amigartooruteqarneq naammagineqanngilaq.