KNR – aamma – coronamit eqqugaavoq

Pingaartumik Nuummi tunillaasornersuup aamma KNR-imi nittartakkami, radiumi aamma tv-mi sulineq eqqorpai.
Suleqataasut ilarpassui tunillatsissimapput. Assi © : Malik Brøns/ KNR
januaarip 14-at 2022 13:49
Nutserisoq Per Rosing

Pingaartumik Nuummi corona ingasavippoq – tamannalu aamma KNR-imik eqquivoq.

Suleqataasut ilarpassui tunillatsissimapput. Kingunerisaanik radioavisit ilaatigut naannerusarput, soorlu aamma Qanorooq aamma knr.gl-imi ulloqartarpoq pisarnermiit ikinnerusunik imaqarfiusartunik.  

- Pisarnkitsitut annertutigisumik tunniussisinnanngilagut, Jens Thorin KNR-imi nutaarsiassaqartitsivimmi akisussaasuulluni aaqqissuisoq oqarpoq.

- Siunissami qaninnermi atuisutta ilimagisariaqarpaat radioavisit aamma Qanoruumi nutaarsiassaqartitsinerit naannerusinnaassasut, soorlu aamma KNR.gl allaserisanik ikinnerusunik saqqummersitsisassasoq. 

Affaannaat sulipput

Nutaarsiassaqartitsivik kisimi taama annertutigisumik eqqugaanngilaq, suleqataasullu inuummarlioraluarlutik sapinngisaminnik sulerusuttut angerlarsimaffimminninngaanniit sulipput. Aamma taamaapput KNR-ip tv-qarfia radioqarfialu, Karl-Henrik Simonsen KNRimi pisortaanerusoq oqarpoq.

- Radio eqqarsaatigalugu massakkut ingerlanermisut ingerlaqqalaarpoq aallakaatitsinerup sivisussusaa annikillinagu. Kisianna aatsaat taamaappoq coronamik eqqugaasut ilaat suli angerlarsimaffimminnit periarfissaqarfimminni sulimmata, tamannalu nannaarutigeqaarput, oqarpoq.  

- Radio massakkut 50 procentiinnarmik inuttaqarluni ingerlavoq, tamannalu malugineqarsinnaalluarpoq. Tunillatsittut siulliit immaqa ataasinngorneruinnartoq utersinnaapput, neriuutigaarpullu tungaanut ingerlaannarallarsinnaalluta.  

- Tv aamma sakkortuumik eqqugaavoq, ataasinngornerulli tungaanut ingerlalluni. Kisianni napparsimasut amerlanerungaalissanngillat aallakatitsinissamik piffissap annikillinissaanut.

Sulinngiffeqartussat amerlasuut Fni

Tunillaassornerup qanoq annertutiginera apeqqutaassaaq qaqugu KNR-ip tamakkiisumik ingerlaqqilernissaanut.  

- KNR qaqugu tamakkersoqqilissanersoq oqaaseqarfigisinnanngilarput. Takoreerparput siornatigut tunillatsissimasut aammaarlutik tunillatseqiittartut, taamaattumillu ilimagisaqarnissaq ajornakusooqaaq, Karl-Henrik Simonsen oqarpoq.

- Upperaarput ullut 14-it ingerlaneranni ajornerpaaffia qaangissallugu, kisanni aammaarluni apeqqutaassaaq Nuummi tunillaassorneq qanoq ingerlassanersoq aamma ilanngullugit suleqataasut atuartunik meerallit. 

Nutaarsiassaqarfimmi suleqataasut ilaat suliartorput sulisussaanngikkaluarlutik. Allat qaangiuttoorput suliffiullu avataani pigaartuullutik qanoq ilisukkulluunniit suliartoqquneqarsinnaallutik.

- Qaangiuttoornerit nassatarisaannik sulinngiffeqarnissat arlaqaqisut ingerlanneqaqqaassapput. Aatsaat tamatuma kingornatigut KNR Nutaarsiassat tamakkersoqqilissaaq, Jens Thorin oqarpoq.