KNI A/S ukioq naappat 40 mio. kr.-nik sinneqartoorumavoq

Aningaasaqarnini ilorraap tungaanut saatinniarlugu KNI-ip Ikummatissaqarnermut, Polaroil-imi allaffeqarfik Maniitsumiittoq Sisimiunut aappaagu nuunnialerpaa Danmarkimilu pisiniarfini ukiortaartinnagu matunialerlugu. KNI A/S-imi paasissutissiisartoq Frederik Olsen iliuusissatik pillugit ima nassuiaavoq.

- Københavnimi Strandgademi pisianiarfipput kalaalimineerniarfinnut aamma assigiinngitsunik eqqumiitsulianik tuniniaaffipput matuniarparput ukiup naanerata missaani. Soorunami ukiuni kingullerni kaaviaartitai amerliartoraluartut amigartoorutit aamma amerliartorsimapput, Frederik Olsen oqarpoq.

Polaroilip ingerlatsivia, qanga Nanortalimmiissimagaluartoq, manna Maniitsumiittoq Sisimiuni KNI-ip qullersaqarfianut aamma nuunniarneqarpoq.

- Malugisimavarput Sisimiunut nuuppat eqaannerusumik anguniagaqarsinnaassalluta. Nuunnissaalu 2008-p ingerlanerani pissaaq. Sulisui manna 12-usut Sisimiunut nuunnissaannut neqeroorfigaat, tamarmillu inissaqarsinnaanissaat sulissutigaarput, Frederik Olsen nassuiaavoq.

Suliffeqarfiit marluk ingerlanneqarnerisa allannguiviginissaat KNI-ip aningaasaqarneranut iluaqutaassanerluni?

- Naatsorsuutigaarput aaqqissuusseqqinnerup kingorna ukiup affaa siulleq 22 mio. koruunit sinnilaarlugit sinneqartoornerput nangiinnarlugu ukiup naanerani 40 mio. koruuninik sinneqartoorsinnaajumaarluta, pisortaq oqarpoq, nangillunilu.

- Suut aaqqinniagassat nalimmassagassallu suli arlaqaalupput. Neriuppugut ukiut pingasut ingerlanerini nalimmassaanermut ingerlallualersinnaassallutigut, taamaalillugu nioqqutissatigut ikummatissatigullu pitsaasumik angusaqarfiulluartumillu ingerlaqqissinnaalerniassagatta, tassa ukiut pingasut, KNI A/S-ip paasissutissiisartua Frederik Olsen naggasiivoq.