KNI: Tusaamaneqarnitsinniit ingerlalluarneruvugut
KNIp sumiiffiit ilaanni nioqqutissanik amigaateqartoqarsimanera ajuusaarutigaa. Kisiannili amigaateqartarnerit atorunnaarsivinneqarsinnaanngillat. Pisisartut pisinianerminni ileqqui allanngoratuartuupput aamma taamaappoq pisisartut akiliisinnaassusiat eqqarsaatigalugu. Tamanna allanngorartuartarpoq aalisarneq ajortumik ingerlanersoq imaluunniit ingerlalluarnersoq apeqqutaatillugu.
- Qaammatini arfineq pingasuni imaluunniit qulini sikuusartuni nioqqutissanik peqarnissamut pilersaarusiortoqartillugu pisiniartoqartillugulu allatuulli aamma KNI kukkusarpoq, taamaattumilluuna peqqumaasivinnik aqutsinissamut periutsimik nutaamik, ilaatigut ukiuunerani pitsaanerusumik nioqqutissanik aqutseriaasissamut nutaamut KNI aningaasaliisimasoq, KNI-mi aqutsisut taama allapput.
Taakku ilanngullugu oqaatigaat sullissinissamik isumaqatigiissutip aningaasartaasa Namminersorlutik Oqartussaniit KNI-mut tunniunneqartartut ukiuni kingullerni ikilerujussuarsimanerat. Aammattaaq nunaqarfinniit nutsernerujussuaq KNI-mut unammillernartuusimavoq sulilumi taamaalluni taamaalilluni arlalipassuartigut ingerlatsineq naleqqussartariaqarsimalluni. Ilaatigut ukiuni kingullerni sisamani sulisut 100-it sinnerlugit ikilisimapput.
Namminersorlutik Oqartussat suleqatigeqqissaarlugit sullissinissamik isumaqatigiissut nutaaq ukiunut arlaqartunut atuuttussaq maanna suliarineqarpoq naak aningaasaliissutit suli appariartoraluartut ingerlatsinerullu suli naleqqussarnissaa pisariaqassagaluartoq, KNI-p aqutsisui taama nalunaarput.
