KNI-p suleriaasertik illersorpaat

Nunatsinni angallannermi aaqqissuussineq nutaaq isornartorsiorneqaqaaq. KNI-li maanna akissuteqarpoq. Angallannermi ingerlatsinertik Sermitsiami ullumi saqqummersumi ilanngussami suleriaasertik illersorpaat.

Ilanngussaq qalipaatigissaaqisoq kalaallisut danskisullu allagartalersugaq kusanaqaaq. Kassut saatsersut, meeqqat qungujulasut sulisullu pikkorissut.

Qulequttami: ”Asasavut nunaqqativut”-mi KNI-p isornartorsiorneqarnini nassuiaasersorniarpaa. Qaatsiartaat ajornartorsiutigineqaqisoq Uummannami aallaveqartussaq ilanngunneqarsimavortaaq. Taliffissaqanngilaq, imarsiornermilu qullersaqarfimmit akuerineqarsimanani.

Ukiortaamiit KNIp angallassisussaatitaaneq oqartussaaffigilerpaa, allaqqavorlu:

Issuaaneq: ”Amerlasuut ilimagisimagaluarpaat ukiortaamiit qaatsiartaat angallassissutigineqalissasoq, pilersaarutaanngisaannarsimavorli” issuaaneq naavoq.

Paasissutissaq nutaaq. Nutaajungaarmat Uummannap borgmesteriata Jens Lars Fleischerip aatsaat tusarsimavaa.

-Paatsuunganarpoq, Jens Lars Fleischer Radioavisimut oqarpoq.

KNI-p pisortaata Gerhardt Petersenip neriuutigisimagaluarpaa ukiortaamit qaatsiartaat angalalissasoq.

Paasisitsiniullu qalipaatigissaartoq pillugu oqarpoq:

”Ersarinnerusinnaagaluarpoq”.

Naqitami qalipaatigissaaqisumi KNI-p neriorsuutigaa qaatsiartaat angallassissutaalerumaartoq. Ullussaa allaat ilanngunneqarsimavoq, neriorsuutigineqarporlu juulip aallaqqaataani angalalerumaartoq.