KNI-p siulersuisuini nutaat marluk
Ingerlatseqatigiiffissuaq Namminersornerullutik Oqartussanit pigineqartoq KNI A/S, ukiup affaani siullermi 75 million koruunit missaanni amigartooruteqareersorlu Naalakkersuisut immikkut ittumik ataatsimeersuartitsipput. Immikkut ittumik ataatsimeersuarneq Inuussutissarsiornermut Naalakkersuisup Sivert K. Heilmannip Naalakkersuisut sinnerlugit peqataasup, ualisoq ammarpaa. Taava oqaluuserisat aappaat tikinneqarpoq, aqutsisullu inatsisilerituup Wilhelm Mallingip siulersuisuni ilaasortanik marlunnik taarsiinissaq saqqummiuppaa:
- KNI-p siulersuisuini ilaasortat Aviaaja Helms aamma Rebecca Olsvig siulersuisuni ilaasortaajunnaarput, taakkualu taartissaattut siunnersuutigineqartut tassaapput Vagn Andersen aamma Jan H. Petersen. Siunnersuutigineqartut akuersissutigineqarput.
KNI-p siulersuisuini ilaasortat marluk nutaanik taarserneqarnerat sumik tunngaveqarnersoq siulersuisuni siulittaasumut Simon Olsen-imut apeqqutigaarput:
- Taanna piginnittut akisussaaffigaat, taakkualu namminneq soorunami aalajangerpaat kikkut tunuassanersut. Tamanna ataqqivarput.
Vagn Andersenip kiisalu Jan H. Petersenip toqqagaanerannut tunngavik:
-Sapinngisamik piumasarineqartut toqqammavigalugit siulersuisut sulisussaapput, taannalu pissutigalugu Naalakkersuisut aalajangernerat ataqqivara.
Naalakkersuisut siulittaasuata Hans Enoksenip qanittukkut oqaatigaa KNI siulersuisoqartariaqartoq kisitsisilerillaqqissunik aqutsilluarsinnaasunillu, taarserneqartut piumasaqaatinik naammassinngitsoorsimanersut apeqqutigaarput:
- Nammineq akissallugu naleqqussorinngilara. Siulersuisut toqqarneqartut kikkulluunniit piumaffigineqartarput piukkunneqartarlutillu.
KNI-mut isumaqatigiissutinik tunngaveqartumik misissueqqissaartoqassaaq. Suliat isumaqatigiissutinut aningaasaqarnermullu tunngasut, pissusissamisoortumik piginnaaneqarluarlunilu, akikinnerusumik ingerlatsiumalluni nalunaaruteqarsimaneq eqquutsinneqarsimanersoq misissueqqissaarfigineqassalluni.
KNI-p siulersuisuini ilaasortaasimasut naatsorsueqqissaartartoq namminersortoq Rebecca Olsvig, inatsisileritoorlu Aviaaja Helms, taarserlugit ilaasortanngortoq Vagn Andersen Grønlands Ejendomsselskabemi pisortaavoq aappaalu Jan H. Petersen, Nuna Oilimi allaffissornermut aqutsisuulluni.
KNI-p siulersuisoqarnikkut aaqqissugaanera tassa ima isikkoqalerpoq siulittaasoq Simon Olsen siulersuisunilu ilaasortat; Vagn Andersen, Jan H. Petersen, Aqqalukasik Kanuthsen, Anna Heilmann Karl Tobiassen sulisullu sinniisaat.
