KNI-p nammineq aningaasaatimigut 1 mia.-it anguai

Suliffeqarfissuaq tallimanik immikkoortortaqarpoq, niuertarfiutilissuaq Pilersuisoq 66-inik niuertarfiuteqartoq,  akitsuusigaanngitsunik niuertarfiit marluk mittarfissuarniittut, KNI Engros, internettikkut niuertarfik Pisisa.gl toqoraavillu Neqi. Nammineq aningaasaatit taamaasillutik ukiup siuliani 961 mio. kr.-iusimasut 1.056 mio. kr.-inut qaffassimapput.

-Piffissami tassani ilaatigut immikkut ittumik angusaqartoqarneratigut taamatut angusaqartoqarpoq taamaattumillu ukiumoortumik naatsorsuutinut naatsorsuutigineqartunut tunngatillugu mianersuutigineqassallutik. Ilaatigut it-mut, niuertarfinnik tankeqarfinnillu nutaanngorsaanermut kiisalu uuliasiornermut aatsitassarsiornermullu tunngatillugu annertuumik aningaasaliisussaavugut, pisortaaneq Claus Jensen oqarpoq.

Suliffeqarfissuup sullitaminik sulisuminillu kiffartuussinikkut nalinginnaasumik qaffassaanissani pingaartillugu iliuusissamik suliaqarpoq. Aammattaaq Pilersuisup pisiniartartuinut tunngatillugu ulluinnarni nioqqutigineqarnerpaasartut akiisa appasittuunissaat qulakkeerniarneqarluni.

-Missingersuutitigut angusanut tunngatillugu pitsanngoriaataasoq nukissiuutinut immikkoortortap immikkut ittumik isertitaqarfigineratigut anguneqarsimavoq, nioqqutissanillu siammarterinermi angusat missingersuutini naammaginartumik angusaqarfiullutik. Ilaatigut uuliasiornermut aatsitassarsiornermullu pilersuinermut atatillugu suliffeqarfiullu iluani nutarsaanissamut annertuumik aningaasaliisussaavugut. Taamaammat suliffeqarfiup aningaasaqarniarnikkut nukittuumik inissisimaannarnissaa pisariaqarpoq, Claus Jensen naqissusiivoq.