KNI-p kaaviiaartitai ikiliartorput
Nunaqarfiit isorliunerusullu inuerukkiartornerat KNI A/S-ip kaaviiaartitaasa ikiliartornerannut pissutaasoq, KNI A/S-ip pisortaa Søren Lennert Mortensen oqarpoq. 2006-imi ukiup affaani siullermi kaaviiaartitanut naleqqiullugu 2007-imi ukiup affaata siulliup ingerlanerani KNI A/S-ip kaaviiaartitai 15,6 million koruuninik ikileriarput. Søren Lennert Mortensen oqarpoq pisortatut atorfinikkamili maannamut nunaqarfiit 40-t tikeraareerini, nunaqarfinnilu niuertut oqaatigisaraat nunaqarfiit inuerukkiartortut, isertitakinneruleriartornermullu nunaqarfiit inuerukkiartornerat pissutaasoq.
- Nunaqarfimmi ataatsimi nunaqarfimmiu ataaseq nuukkaangat agguaqatigiissillugu kaaviiaartitavut 35.000 koruuninik ukiumut ikileriartarput, Søren Lennert Mortensen oqarpoq. KNI A/S-ip pisortaa Søren Lennert Mortensen oqarpoq kaaviiaartitat ikiliartornerat sulisunik soraarsitsiortornermik kinguneqarnavianngitsoq allatigulli aningaasartuutikillisaanikkut iluarsiiviginiarneqartoq.
