KNI-mi siulersuisut nutaanngussapput

Danskiusoq inuussutissarsiornermi suliaqartoq Vagn Andersen KNI-mi iluarsartuussisussanngortitaasussanngorunarpoq aviisi Sermitsiaq allaaserisaqarpoq.

Taassuma aqqa aatsaat avammut tusarliunneqalinngilaq, qaammatimmi ataatsip matuma siorna aamma taassuma Arctic Umiaq Line iluarsartuuppaa.

Radio aviisimilu ippassaq tusarliupparput KNI-p piginnittuata tassalu Namminersornerullutik Oqartussaasut decembarip sisamaanni immikkut ittumik ataatsimeersuartitsinissaani KNI-mi siulersuisut taarserneqartussanngortut.

- Kisitsisilerillaqqissunik siulersuisortaartariaqarpugut. KNI suliffeqarfimmut aqutsillaqqissunik siulersuisoqartariaqarpoq, naalakkersuisut siulittaasuat Hans Enoksen radioaviisimut oqarpoq.

2006-ip ingerlanerani KNI A/S-ip ukiup affaanut naatsorsuutaani siullerni 75 millioni koruuninik amigartooruteqarneq immikkut ittumik ataatsimeersuartoqartussanngorneranut patsisaapput. Amigartoorutillu tamakku qaatsiartaat atorsinnaanngitsoq pisuulluni amigartoorutigineqarput.