KNI immikkut ittumik ullumi ataatsimeersuassaaq
Nunatsinni suliffeqarfissuit anginerpaat ilaat, tassalu KNI, ualeru nalunaaqutaq pingasuniit immikkut ittumik ataatsimeersuassaaq, tassunga qaaqqusisuulluni Naalakkersuisut siulittaasuat, Hans Enoksen.
KNI-p immikkut ittumik ataatsimeersuarnissaani siulersuisuni ilaasortat ikinnerpaamik marluk allanik taarserneqarnissaat ilimagineqarpoq.
KNI ukiup affaani siullermi 75 millioni koruuninik amigartooruteqareersorlu, Naalakkersuisut siulittaasuat immikkut ittumik ataatsimeersuariaqqusivoq, taamaattumillu ataatsimeersuarnissami aningaasaqarnermik aaqqiinissamut tunngasut aamma oqaluuserineqarnissaat naatsorsuutigineqarpoq.
Aningaasarsiornermik inuussutissarsiornermillu immikkut ilisimasalik, Arctic Umiaq Linemik iluarsartuussisoq, Vagn Andersen, KNI-p siulersuisuini ilaasortanngussalluni oqarfigineqarsimavoq.
Siulersuisuni siulittaasup, Simon Olsenip, siulittaasuuinnarnissaa ilimagineqarpoq.
