KNI bygdeservice umiarsuaatileqatigiiffinngussaaq

Naalakkersuisut akuerineqassappata KNI A/S januaarip aallaqqaataanit 2006 umiarsuaatileqatigiiffinngussaaq nunaqarfinnut nioqqutissanik pilersuineq tamakkiisumik akisussaaffigilerlugu, akisussaaffik Royal Arctic Bygdeservicep maannamut akisussaaffigaa akisussaassuseerutitaanissanilu apeqqusertuarsimallugu.

KNI A/S-ip siunissami akisussaaffii inuussutissanik tunisassiornermut umiarsuaatilittullu allaat akisussaanermut ilanngullugit amerlineqassanersut sapaatip akunneri marluk qaangiuppata inatsisartut isummerfigissavaat.

Naalakkersuisut misissuisitaata Maersk Brokerip siunnersuutaatut selskabit pingasut maanna nunaqarfinnik sullisseqataasut tamarmik KNI-mut atalissapput.

Aallaqqaataaniilli pingaartumik Royal Arctic Bygdeservice taama aalajangiiniarnermut nangaassuteqartuarsimavoq, allaat Royal Arctic Linep aamma Servicep direktørii, Jens Andersen Niels Clemmensenilu septemberip ulluisa 30-anni Namminersorneq pillugu pisortaqarfimmut allallutik Maersk Brokerip nalunaarutaa nunaqarfiit angallavigineqarnerata politikikkut aalajangiiffiginissaanut tunngavigissallugu amigartoq.

Direktørit taakku isumaqarput nunaqarfinnik KNI-p pilersuilernissaa Maersk Brokerip naatsorsuutigisaanit akisunerussasoq inuussutissanik nutaarpianik assartuutit qanoq aningaasartuutaanissaat suli ilisimaneqanngimmat angallatinut Bygdeservicep maanna atugaanut naleqqiullutik.

Nutaarpianik assartuutit pingsut KNI-p maanna pigereerpai sulilu pingasut pissarsiarilersaarlugit, aamma kalaallit umiartortut 40-50-it suliffissaaruteriaannaapput, norgemiummi umiarsuaat atorneqartussaapput. Kalaallillu umiartortut tamarmik norgemiut umiarsuaanni inuttaanissamut amerlagupput.

Royal Arcticermiulli ajortussarsiuinnavipput, Maersk Brokerermiut akipput.

Aamma isumaqarput inuussutissanik nutaarpianik assartuutip ataatsip ukiumut halvanden millioninik akeqarnera selskabit ataatsimuulernissaannik naatsorsuusiamut ilanngutissallugu isumaqanngitsoq.

Maersk Brokerermiut amma oqarput nalunaarutertik umiartortut kalaallit suliffissaaruttussat assartuutinut ikitinnissaannik imaqanngitsoq, nalunaarusiamiinilu taamaallaat oqaatigigitsik norgemiut kalaallinik inuttaqarnissartik nangaaffiginngikkaat, akissarsiariumaagaallu taaneqanngitsut.

Maersk Broker aamma akivoq nioqqutissanik nutarpasissunik assartuutinik atuiniarneq selskabit ataatsimoortinnialernerisa nassatarinngikkaat, KNI-mi taamaattunik pingsunik peqareerpoq nutarteriniarnerlu una piviusunngunngikkaluarpalluunniit taakku pigiuassagai.