KNI A/S.

KNI A/S pillugu inatsisartut siullermeerlutik aqagu oqallinnissaraluat, pingasunngornermut oktoberip 27-ianut kinguartinneqarpoq.

KNI A/S pillugu oqaluuserisaqarnissami Pilersuisup nunaqarfinnut ilaasunik usinillu angallassinermi ukiortaaq aallarnerfigalugu isumaginnittunngornissaa ilanngullugu oqaluuserineqartussaavoq. Tamannalu pillugu nalunaarusiap Mærsk Prukers-ikkunnit suliarineqartup qallunaattuumiit kalaallisut nutserneqarnera kinguaatoorfiummat, oqaluuserisassaq kinguartinneqartariaqarsimasoq, Naalakkersuisut allattoqarfianiit oqaatigineqarpoq.

Pilersuisup nunaqarfinnut ilaasunik usinillu angallassinermi isumaginnittuulernissaa pillugu nalunaarusiaq, siusinnerusukkut radioaviisikkut sammineqangaatiarpoq, taamak siusitsigisumik allannguinissaq ilaatigut uparuartorneqarluni. Taamanikkullu Pilersuisup direktøriata Gerhardt Petersen-ip saqqumiuppaa taamatut ikaarsariarnissaq piffissami sivisujaami ingerlanneqassasoq naatsorsuutigalugu.

Tamatumalu tassa inatsiartuni oqaluuserineqarnissaa aqagu pisussaagaluartoq oktoberip 27-ianut kinguartinneqarpoq, nalunaarusiap qallunaattuumiit kalaallisut nutserneqarnera ilimagisamit kigaanerusumik ingerlanneqarmat.