KNAPKp tapiiffigeqqunera akerlilerneqarpoq
Aaqqissutip akit qaffannerinut maannalu aalisakkat, qaleruallit puisillu amiisa tunineranni akit appasinnerinut taartaassasoq aalisartut isumaqarput. Tamannali Demokraatinit Kattusseqatigiillu partiiannit akerlilerneqarpoq.
Ikummatissanut tapiissutit maanna atuutilertariaqartut, KNAPK-p siulittasua Leif Fontaine tusagassiutinut nalunaarummi allappoq.
Erseqqissaassutigaalu, nunarput pisuussutinik uumassusilinnik nunanut allanut tunisinermi milliardilikkaanik ukiut tamaasa kaaviaartitaqartartoq, tamannalu aallaavigalugu aalisakkanut akigititat nunatsinni inuuniarnerup akisuneranut tulluunnerusariaqaraluartut.
- Aqutsiveqarfinni qaleralinniarfiusini qalerallit kiilumut akii ukioq manna qaffakkaluartut taamaattoq nunarsuarmi akiusunut naleqqiullugit aalisartup kiilumut pissarsiarisartagaa affaannangajammik naleqarmat, Leif Fontaine allappoq, nangillunilu, KNAPK piareersimavoq tapiissutinik aaqqissuusisoqarnissaa anguniarlugu isumaqatigiinniarnissat maanna aallartissallugit.
Tamannali ajornakusoorsinnaavoq. Naalakkersuisut siulittaasuata tullia, Jens B. Frederiksen, qanittukkut apersorneqarnermini aalisartunut tapiissutinik aaqqiissuusisoqarnissaa itigartilluinnarpaa, ikummatissat akitsorneri aalisartuinnarnut eqquisussaannginnerarlugu suliffeqarfiilli tamarmik eqqorneqassasut.
Demokraatit sinnerlugit Inatsisartuni ilaasortaq Niels Thomsen aamma aalisartut immikkut pineqarnissaannut akerliuvoq orussap akitsornerata inuiaqatigiit tamaasa eqqormagit. Taassuma taarsiullugu siunnersuutigaa aalisarneq naleqqussartariaqartoq kattussuunnikkut angalatit angisuut atorlugit ingerlatsineq ullutsinnut tulluarnerusutut tikkuarlugu.
Kattusseqatigiit Partiiat sinnerlugu Inatsisartuni ilaasortaq Knud Fleischer aamma tapiissuteqarnissamut akerliuvoq.
- Paasisinnaanngilara pisoqarneri tamaasa aalisartut tapiiffigineqarnissamik qinnuteqartarnerat, Knud Fleischer taama oqarpoq.
