KNAPK: WSPA quppersakkamik tunuartitsisariaqarpoq
- Kalaallit Nunaanni Aalisartut Piniartullu Kattuffiata akuersaarsinnaanngilluinnarpaa nunatsinni piniartut inuuniarnikkut atugaannik WSPA-p eqqunngitsunik tunngavilersorluni innarliiniarnera, Leif Fontaine kaammattuummini allappoq.
- Nunatsinni aalisartut piniartullu allatulli nunarsuarmi innuttaasutut inooqataapput, inuuniarnermi pisussaaffeqarlutik angallatiminnut, illuminnut nalinginnaasumillu ulluinnarni inuuniarnermi aningaasartuuteqarlutik ulluinnarni sulinermikkut akilersukkaminnik. Taamaattumik KNAPK-p akuersaarsinnaanngilluinnarpaa, WSPA-mit nunanillu Tuluit Nunaanniit, Tyskland-miit, Australia-miit, Schweich-miit allaniillu arfanniarnermut akerliusuniit, nunatsinni aalisartut piniartullu immap pinngortitallu tunniussinnaasaanik inuuniuteqarnerat “katersugaasivimmi takutitassatut” assersuunniarneqartarnera isiginiarneqartarneralu, Leif Fontaine oqarpoq.
KNAPK-p taama nalunaarnermigut sakkortunerpaamik WSPA-p quppersagaliaata tunuartinnissaa piumasaraa.
- Quppersakkap kanngunartuliap tunuartinneqarnissaa ataatsimiinnermi piumasarissavarput. Ilumoorluinnartuuvoq nunarput IWC-mi piumasaqaatinik unioqqutitsinngilluinnartoq, KNAPK sinnerlugu Leif Fontaine, arfanniaq allakkamini taama oqarpoq.