VIDEO KNAPK tunisinermi akit pillugit piumasaqaateqarnissaminut atatillugu misissuisitsisoq

- Maani akit nikippiarsimanngillat nunanili eqqaamiorisatsinni akit pingasoriaammik qaffassimallutik, KNAPK-p siulittaasua Henrik Sandgreen KNR-imut taama oqarpoq.

Aalisartut piniartullu kattuffiata akit akulikitsumik misissuiffigisarpai. KNAPK-llu misissuinerata kingulliup takutippaa piffissamut 2009-2014-imut tunngatillugu saarulliit 36 procentinik akitsorsimasut raajallu 9 procentinik akitsorsimasut.

- Tamatuma aamma takutippaa Nunatsinni aalisarnikkut inissisimanitsigut aaqqiissuussinermi sakkussatut atorneqarsinnaasoq, siulittaasoq oqarpoq.

Isumaqatigiinniarnerni?

- Aap, isumaqatigiinniarnernut. Uani immaqa pingaarnerpaavoq pilersaarusiornermut aammalu siunissamut tunngasuni, kisitsisinik eqqortunik toqqammaveqarluni ineriartortitsinissaq pingaaruteqarmat, Henrik Sandgreen taama oqarpoq.

Aamma atuaruk Qaleralinnut akitsuusersuinissaq akuersissutigineqarpoq

Islandimi, Savalimmiuni Norgemilu aalisartut pissarsinerusartut

Nunani Islandimi, Savalimmiuni Norgemilu tunisinermi akit Nunatsinnut sanilliullugit qaffasinnerungaatsiarput, taamaammat KNAPK-p Nunatsinni tunitsiviit ingerlaavartumik oqaloqatigisarpai.

- Assigiinngitsorpassuit uani nipilersoqataapput, aamma aalisakkap pitsaassusianut passusseriaatsimullu tunngasut.

- Kisianni akit isigilerutsigit, taavalu aamma angunissaanut qanoq iliuuseqarnissatsinnut, taava aamma pilersaarusiorsinnaanngussaagut, soorlu aningaasaliisoqassappat, saaffiginnissutigineqassappata qanoq annertutigisumik akeqassanersoq. Tassa tamakkununnga tunngaviusumik sakkussaqalerpugut, KNAPK-p siulittaasua taama oqarpoq.

KNAPK-p misissuisitsinera kingulleq aalisartunut ippassaq unnukkut saqqummiunneqarpoq.