KNAPK: Saarullinnik 1.000 tonsinik pisassiineq naammanngilaq

Aalisartut amerlanerusut qaleralinniarnermit saarullinniarnermut ikaarsaartinnissaat anguniarlugu Naalakkersuisut siulittaasuata Hans Enoksen-ip Aalisarnermullu naalakkersuisup Finn Karlsen-ip saarullinniarnissamik pisassiissutit akueraat, ilanngullugulu North Greenland Seafood-ip aalisariummik attartornissamut qinnuteqaataa immikkut akueralugu. Taama Hans Enoksen tallimanngornermi kingullermi radioaviisimut nassuiaateqarpoq.
Allattoq Louise M. Kleemann
aggustip 11-at 2008 13:41

Aalisartut amerlanerusut qaleralinniarnermit saarullinniarnermut ikaarsaartinnissaat KNAPK-p siulittaasuata Peter Olsen-ip isumaqataaffigaa.

- Kisianni suliffeqarfik 1.000 tonsinik saarullittassiissuteqarluni aallartiinnavissinnaanngilaq, tassami aalisariutisiniaqqaartussaassaaq, assigiinngitsunillu aningaasartuuteqartussaassalluni, suliffeqarfillu aallartilluassappat pisassiissutigineqartoq anginerusariaqarpoq, Peter Olsen oqarpoq.

Peter Olsen, Nunatsini Sulisitsisut Kattuffiannit Sulisitsisullu Kattuffiannit aallartitat peqatigalugit tallimanngornermi kingullermi Naalakkersuisunut ilaasortamut Finn Kalsenimut ataatsimiigiaqqusaavoq, tassani immikkut akuersinerup tunuliaqutaanik ilisimatinneqarlutik. Ataatsimiinnerli pisassiissummut immikkullu akuersinermut paasinninnerulernermik kinguneqanngitsoq Jens K. Lyberth-ip Sulisitsisut Kattuffianneersup oqaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq