KNAPK: -Royal Greenlandip aqutsisui pikkorinngilluinnarput!

Royal Greenlandip aqutsisui nersualaarneqartaqisut pikkorinngilluinnarput.

Februuarip aallaqqaataa aallarnerfigalugu raajat tunitsivinnut tunineranni aki kiilumut 50 øre-mik Royal Greenlandip annikillimmagu taama KNAPK tutsiuppoq.

- Isornartorsiuinitsinnut tunngavigaarput, raajat akii februaarip aallaqqaataaniit Royal Greenlandip 50 øremik akikillimmagit. Tamannalu KNAPK-p raajarniartuisa ataatsimeereernerisa kingunerisaanik akuerisinnaanngilluinnaratsigu raajat 50 øremik akikillineqarnerat, Peter Olsen oqarpoq.

Taanna nangilluni massuavoq, Royal Greenlandip ileqquni atorlugu namminersuutigisaminik akinik appaasoq.

- Illuatungerisani isumaqatiginninniarnernik soqutiginngitsutunaasiit kingumut ersersippaa qanoq suusupaginnitsiginini pilersuisuminut, Peter Olsen oqarpoq.

- 50 øremik appaaneq ima isumaqarpoq raajarniat amerlanerpaarpaartaasa nammassinnaanngilaat raajat akiinik appaaneq, oqarpoq.

Peter Olsen erseqqissaavoq Royal Greenland akit pillugit oqaloqatiginneqqikkusussimanngitsoq taamaattumillu Naalakkersuisut tamaasa ataatsimeeqatiginiarlugit saaffiginnissimallutik, ajoraluartumilli Naalakkersuisunit suli akissuteqarfigineqarsimanatik.

Peter Olsen aperaarput Naalakkersuisut ataatsimeeqatigigaluarunikkilluunniit susoqanngiinnarpat qanoq iliussanersut.

- Taava nunap matuma aquttui aalisartunut raajarniartunut soqutigisaqanngilluinnaqqissaarsimassapput. Raajarniarneq suliffissarpassuarnik pilersitsisuusartoq, taama suusupagalugu isiginngitsuusaaginnarsinnaanngilaat.

Nunami suliffissuarmi sulisut, imaanilu sulisut, illumilu ittuusorpassuit suliffissaarullutik suliffiit matooraannarneqartarput politikkerit isiginnaaginnartuusimassapput, aalisarnerup tungaatigut politikki paasissaasimasinnaanngilaq, Peter Olsen oqarpoq.

Malitsigitillugu aperaarput Royal Greenlandip aqutsisui qanoq isumaqarfiginerai.

- Royal Greenlandip aqutsisui soorlu Danmarks radiokkut nersualaarneqarujorujussuartarput uagut nersualaarneqarnerujussui apeqquserujussuarpagut. Royal Greenlandip aalisakkanut akigititai nunarsuarmut allanut naleqqiullugu appasinnerujuaannartigisut, iluanaarutillu taamak annikitsigitillugit nersualaarneqarsinnaanngillat, Peter Olsen oqarpoq.

Suleqatigiissitalianik Royal Greenlandip aalisartullu akornanni aaqqiiniartartussanik pilersitsisoqartoq KNAPK-mit aamma ilisimatitsissutigineqarpoq.

Februaarillu 15-iani nalunaaqutaq marlunut Royal Greenland ataatsimeersuartitsisussaalluni.