KNAPK Royal Greenlandilu isumaqatiginninnialerput

KNAPK Royal Greenland-ilu isumaqatiginninniarlutik ullumi aallartipput, raajat akii nutaat pillugit isumaqatigiinniasallutik.

Peqataasulli imminnut ungasikkallartut oqaatigineqarpoq.

Nunatsinni suliffeqarfiit annersaata, Royal Greenlandip, oktobarip 18-ini raajanut isumaqatigiissut taamaatippaa, paasinarsimmammi 50 millioni koruuninik Royal Greenland annaassaqarsimasoq.

Isumaqatigiissut atorunnaartoq oqaluuserineqarsimaqaaq tassami sapaatip akunnerini arlalinni kingullerni raajat akii isumaqatigiinngissutaasimaqimmata.

KNAPK illuatungaani sinerissap qanittuani raajarniartarnermut isumakuluuteqarput. Raajat akiisa apparpallaarnissaat annilaanngatigalugu.

Raajat akiisa kiilumut koruunimik appartinneqarnissaat Royal Greenlandip piumasaraa, illuatungiliuttullu tamanna akuersaarumaanngilaat.

1 koruuni annertugisassaanngikkunaraluarpoq, raajartalli tamakkiisumik isigissagaanni 1 koruuni annertuutut nalilerneqarsinnaavoq.

Illuatungeriit ullaap tungaa aqqanermut qiteqquttoq isumaqatigiinniarnerit aallarteqippaat.

Isumaqaatigiittoqarnissaa ilimagineqanngilaq, arlaannaallunniit nakkaannarumanavianngimmat.