KNAPK: Raajarniat akinut appaanermut akiliisuupput
Raajat akii pillugit KNAPK-p Royal Greenlandillu akornanni isumaqatigiinniarnerit unittoorput, akit Royal Greenlandimit illuatungaannarsiortumik kilomut 0,50 koruunimut appartinneqarmata, ullumikkullu akit qulaanit naalakkiutit raajarniat nappatigisinnaanngilluinnarpaat, KNAPK Naalakkersuisunut saaffiginneqattaarpoq naalakkersuisulli suli iliuuseqanngillat, taamaattumik sinerissamut qanittumi raajarniat ajutoornissaat utaqqiinnarnagu qinikkat iliuuseqapallattariaqalivipput, KNAPK-mi siulersuisuunerit ukiumoortumik februaarip qulinganni ataatsimeeqatigeereersut taama allapput.
- Royal Greenland januaarimi nalunaarpoq 2006-imi sinneqartoorutitik siornaammut naleqqiullutik appariarujussuarsimasut. Raajat akiinik taamaattumik appaanermut angusaqarnerliornertik aalisartunut nammatassissutigaat. KNAPK-mi siulersuisut ilaatigut allapput.
Raajat akiinut tunngasut saniatigut nunatsinni piniarnikkut pissutsit allanngoriartornerat piniakkanullu tunngasut KNAPK-p siulersuisuisa ukiumoortumik ataatsimiinnerminni oqaluuseraat.
- Silap, pinngortitap uumasusillillu pissusaasa allanngoriartornerat ilisimaaralugu malinnaaffigaagut, pingaartumik piniarnikkut sunniutai imaannaanngitsut erseraluttuinnarput.
- Pissutit allanngoriartortut Naalakkersuisunit Inatsisartunillu isiginngitsuusaarneqarnerat akuersaarsinnaanngilarput, taamaattumik pinngortitaq piniakkallu pillugit Namminersornerullutik Oqartussat isumasioqatigiissitsisariaqarput, KNAPK siulersuisui allapput.
