KNAPK: Qaleralittassat amerlineqartariaqarput

Uummannap sulluani qaleralinniat sisamanngormat tunisisinnaajunnaarput, ukioq mannamut qaleralittassat 5000 tonsit taakkualu saniatigut pisassiissutigineqartut 549 tonsit pisarineqareermata.

Pisassanik ukiup naannginnerani nunguutsisarneq siunissami suli taamatutu pisoqartuarnissaa KNAPK-mit ilimagineqarpoq.

- Pisassat ikippallaarput, Isak Vahl, KNAPK-imi siulittaasup tullia oqarpoq. Pisasseeriaaserlu aaqqissuunneqaqqittariaqartoq tikkuarlugu.

Qalerallit pisassiissutigineqartut aalisartunit ukiup naanissaanut naammattusaartumik aalisarneqarsinnaannginnamik?

- Ukiut pingasut-sisamat matuma siorna pisassat amerlanerupput ukiumut 8.000 tonsit missaanniillutik. Taamaammat maanna taama annikitsigitillugit nunguttarnissaat ilimanartorujussuuvoq, Isak Vahl oqarpoq.

Taamaammat allatut aaqqiisoqartariaqarsoraa:

- Periarfissat pittsaanersarissavaat kommunit ataatsimuulernerat aalisariutillu angissusaat sumullu nikerarsinnaanerat apeqqutaatillugit ataatsimoortumik pisassiinikkut nunguutsiaartarnermit aniguiniartoqarsinnaavoq, oqarpoq.

Siullermilli pisassat amerlineqartariaqartut, Isak Vahl kaammattuivoq.

Pisasseeriaatsip aaqqissuuteqqinnerata saniatigut avataani kilisaatersorluni qaleralinniarnerup killilersorneqalernissaa Isak Vahlip siunnersuutigaa, tassani avataasiortut qalerallit suffisarfianni aalisartartut killilersorneqassasut oqaatigalugit.

Uummannap sulluanut qaleralittassat suli amerlanerusariaqartut KNAPK-imit sulissutigineqartoq, Isak Vahl oqarpoq, tamannalu piujuaannartitsinissamut innarliinerunaviannginnerarpaa.