KNAPK paatsoorsimaneragaavoq
Nannutassat pillugit tusarniaasarnerit iluamik atorneqartannginneri, KNAPK-mit ippassaq naammagittaalliutigineqarpoq. Piniarnermut pisortaqarfimmi immikkut siunnersorti Ole Heinrich isumaqarpoq, KNAPK paatsuugaqarsimassasoq.
- Massakkut tusarniaaneq pisassiissutit tamarmiusut pillugit, nuna tamakkerlugu tusarniaanerunani pisassiissutit tamarmiusut aalajangersarneqareersut kommuninut qanoq agguataarneqassanersut tusarniaanerulluni.
Paatsoorsimassagaat nalilerpara, Ole Heinrich oqarpoq nangillunilu: - Pisassiissutit tamarmik tusarniaassutigineqanngillat, tusarniaanermi kingullermi. Tunumi pisassiinermi nalunngilarput taakkua amerlanerusunik pisassinneqarnissamik qinnuteqarsimasut, biologilli ilisimatussutsikkut siunnersuinerminni oqarsinnaannginnamik tunumi piniartarneq, ilumut piujuaannartitsinissamik tunngaveqarnersoq. Taamaattumik mianersornissamik tunngavissaqarnissaq, uagullu pisussaaffigigatsigu pinngortitap illersorneqarnissaa, inatsillu tunngavigalugu pisassat siusinnerusukkut pisaasartunut ikinnerulaarsillugit aalajangersarsimavagut. Aamma Tunumi piniartunit kissaatigineqarnikuuvoq siunissami tammajuitsussarsiniartitsilluni nannunniartitsisarsinnaaneq, taannalu eqqunneqassappat, pisaasartut, siusinnerusukkut pisaasartuninngaanniit amerlanerussanngillat, nunarsuarmioqatitta akuerisinnaasaannik tammajuitsussarsioluni aallartinneqasappat, taanna kissaatigineqanngippat, soorunami pissutsit allaasorujussuussagaluarput. Aalisarnermut Piniarnermullu pisortaqarfimmi immikkut siunnersorti Ole Heinrich taama oqarpoq.
