KNAPK-p nalakkersuisunut orsussamut tapiissutit naliliivigeqqeqquai
Orsussap akia ippassaq 10 procentit missaannik qaffappoq.
Biilertunuinnaq eqquinngilaq. Suliffiit assigisaallu orsussamik atuisartut eqqorneqarput, soorluttaaq aalisartut piniartullu akinik qaffaanermik eqqorneqartut.
KNAPK maanna Naalakkersuisunut piumasaqarput aalisartut orsussamut tapiiffigineqarnissaat nalilersoqqullugu.
- Politikkikkut oqartussaasut aalisartortaminnut politikkikkut qanoq ikiuerusutsiginerat assorujussuaq apeqqusertariaqarpoq. Isumaqarpunga annikitsuararsuusoq. Orsussap tapiiffigineqarnissaannut KNAPK-p qinnuteqaataa nutaamik nalilersortariaqarpaat, Peter Olsen oqarpoq.
Benziina, dieseli, petroleullu akii tamarmik immikkut 34 oorinik qaffaavigineqarput. Assersuutigalugu benziinap liiterimut akia 3 koruunit 52 oorimiit 3 koruunit 86 oorimut qaffalluni.
Naallu KNAPK-p nunarsuarmi uuliap akia aqussinnaanngikkaluaraa, nunatsinni aalisartut aningaasartuutaat annikillisarneqarneqarnissaat sulissutigerusuppai.
Peter Olsenilli naalakkersuisut aperai aalisartut ajornartorsiuleraluttuinnartut isiginnaaginnarniarneraat:
- Inuutissarsiortut aningaasartuutaat qaffakkiartuinnassappata, aalisakkallu akii taamaaginnassappata, aalisartorpassuit ajornartorsiuleraluttuinnassapput. Naalakkersuisut issiavimmut ingiinnarlutik tamakku isiginnaaginnassanerpaat? KNAPK-p siulittaasua Peter Olsen aperivoq.