KNAPK Narsaq Seafoodilu isumaqatigiissuteqarput
Nipisaat suaannut minnerpaaffittut akigititassat pillugu isumaqatigiissuteqartoqarpoq, isumaqatigiissutaasorlu KNAPK-p Narsaq Seafoodillu naammagisimaarpaat.
Allattoq Peter Troelsen, Simon Uldum
marsip 26-at 2013 12:14
Aalisartut tungaannit nipisat suaannut kiilumut minnerpaaffittut akigititassatut 22,00 kr. kissaatigineqarsimavoq, tamannalu Narsaq Seafoodip akuerisimavaa. Kiilumut minnerpaaffittut 20,00 kr., kiisalu immikkut bonus 2,00 kr. kg.-mut isumaqatigiissutigineqarpoq.
-Nuannaarutigisatsinnillu aamma suli Narsaq Seafood A/S-ip aalisartunut bonusip qaffakkiartuaartumik aalisartunut tunniunneqartartussatut aaliangerpaa, tassalu suaat niuerutigineqarnerini akigitinneqartut kr. 40,00 – 45,00 – 50,00 kiisalu 55,00 koruunip tungaanut qaffassappata, tassani tamatigut kr. 1,00 –imik bonusi qaffariartartussanngorlugu. Taamaasilluni naggataatigut suaat kiilumut 24,00 koruuneqarsinnaanngorlugit, KNAPK-mi pisortaaneq Petrus Biilmann oqarpoq.
