KNAPK: Naalakkersuisut akuliuttariaqalerput

Raajat akii pillugit KNAPK-p Royal Greenlandillu isumaqatigiinniarneri unittoorput, akit Royal Greenlandimit illuatungaannarsiortumik kilomut 0,50 koruunimut appartinneqarput, ullumikkullu akit qulaanit naalakkiutit raajarniat nappatigisinnaanngilluinnarpaat, taamaattumik raajarniat ajutoornissaat utaqqiinnarnagu qinikkat iliuuseqapallattariaqalivipput, KNAPK-mi siulersuisuunerit ukiumoortumik februaarip qulinganni ataatsimeeqatigiinerminni isummerput. Taama isummernertik KNAPK-p siulittaasuata Peter Olsenip ima tunngavilersorpaa:

- Royal Greenlandip oqaloqatigeqqinnissaa assorujussuaq kissaatigaarput. Kisianni Royal Greenlandi aalajangersimavoq raajat akii eqqartoqqikkumanagit, taamaattumillu KNAPK-it Naalakkersuisunut piumasaraarput raajat akiinut minnerpaaffigliisariaqartut, minnerpaamik 50 øremik akitsoqqillugit. Raajat 30.000 tonsit aallaavigalugit – tassalu minnerpaamik 15 million koruunit- raajat akiisa minnerpaaffilerneqarnissaannut atorneqartussatut piumasaraarput.

KNAPK Naalakkersuisunut saaffiginnittaraluarneri maannamut annertunerusumik nikitsitsinngillat.

- Piffissami qaninnerpaami aappi naaggaluunnit tusarusupparput.

Peter Olsen isumaqarpoq Naalakkersuisut isumaqatigiinniarnernut akuliuttariaqartut.

- Royal Greenland akitigut nikeqqikkumanngilaq, allatut ajornaqaaq. Taavalu akit taamaatsillugti raajarniat aningaasarsiornikkut qaangersinnaanngisaminnut piartorput.

Peter Olsen isumaqarpoq Naalakkersuisut akuliunnissaat pissusissamisoortariaqartoq.

- Inussustissarsiutit pingaarnersaat suliffissarpassuarnik pilersitsisartoq aningaasarsiornikkut taama ilungersunartorsiorfiutillugu, nunami maani politikkikkut oqartussaasut soqutigisariaqarpaat inuussutissarsiornerup taama pingaaruteqartigisup ingerlaannarnissaa.

Naalakkersuisut tungaanniit iliuuseqartoqanngippat raajarniat peqatigalugit ataatsimiittoqassaaq, ataatsimiinnermilu naggataagut qanoq iliortoqarnissaa aalajangerneqarumaartoq Peter Olsen oqarpoq.