KNAPK: Naalakkersuisut aalajangiiumaarput

Nunatta imartaata kissakkiartornera ilutigalugu saarulliit takkukkiartulersimapput. Pinngortitaleriffimmi biologit taama oqarput. Saarulliilli raajatuumasuummata raajat ikiliartorsinnaapput.

Taava qanoq pisoqassava? Raajat pilliutigalugit saarullinniartoqalissava? Kikkut aalajangiisuussappat? KNAPK-p pisortarigallagaata John Biilmannip apeqqutit taakku ima akivai:

- Naalakkersuisut aalajangiisuussapput. Aalisarnermut siunnersuisoqatigiit innersuussutaat tunngavigalugit aalajangiissapput. Saarulliit uteqqeriasaassagaluarpata suleqatigiissitaliamik piareersimasussamik piareersaasiorput, aalisarnermullu soqutigisaqaqatigiit tamarmik tassani issiapput, John Biilmann oqarpoq.

Raajat imaluunniit saarulliit aalisarneqassanersut taamanikkussamut aalajangerneqarumaartoq, periarfissallu assigiinngitsut qimerloorneqarumaartut John Biilmannip aamma oqaatigaa.

Saarulliit nungusaataanngitsumik piniagaanissaat angujumallugu, saarulliit aalisarneqarnissaat utaqqeqqaarneqartariaqartoq KNAPK-p siunnerfigaa.