KNAPK-miit naalakkersuisunut allakkani ammasuni ilaatigut allapput Aalisartut Piniartullu Kattuffiata EU-p Kalaallit Nunaata qipoqqartassinneqarnissaanut akerliunera akuerisinnaanngilluinnaraa. Pissutsit taamaatsillugit KNAPK-p nunatta naalakkersuisuinut sakkortunerpaamik piumasaqaatigaa nunatta EU-mut aalisagartassiinermut isumaqatigiissutaa massakkorluinnaq nalilersoqqullugu pisariaqassappallu piaarnerpaamik atorunnaarseqqullugu.
Taassuma saniatigut nunatta iluani pisuussutinik uumaatsunik soorlu uuliasiorneq ilanngullugu iluaquteqarniarnermi selskabit EU-meersut misissuinissamut atuinissamulluunniit mattunneqarluinnarnissaat nunatsinni naalakkersuisut nalilersortariaqaleraat KNAPK isumaqarpoq.
KNAPK-p EU-mut erseqqissaatigerusuppaa isumaqarami nunarsuarmi naalagaaffiit peqatigiiffiata FN-ip akuersissutigeriigaa ”Nunat Inoqqaavisa Pisinnaatitaaffii” pillugit nalunaarut EU-miit unioqqutinneqartoq.
Tamannalu tunngavigalugu KNAPK-p nunatta naalakkersuisui sakkortuumik kajumissaassavai EU Inuit Pisinnaatitaaffii Pillugit eqqartuussivissuarmut tunniuteqqullugit.
IWC-miit pisassinneqanngikkutta Kalaallit Nunaanni Naalakkersuisunut kaammattuutigerusupparput nunatta namminerisamik imminnut qulinik qipoqqartassiinissamik aalajangeeqqullugit, tunngavissaqanngilluinnarmammi taamaaliunnginnissamut.