Aalisartut piniartullu kattuffianni KNAPK-mi piffissaq tulliuttoq qullersaqanngikkallassaaq.

KNAPK-mmi siulittaasua, Nikkulaat Jeremiassen qinersisoqarnissaanut tunngatillugu marsip aqqarnata tungaanut kattuffimmi atuuffimminit sulinngiffeqarallarpoq.

Taassuma sulinngiffeqarallarnera Siumut sinnerlugu Inatsisartunut qinigassanngortinneranik pissuteqarpoq.

Inatsisartunullu naammattunik taaguunneqassaguni KNAPK-p malittarisassai malillugit siulittaasuuginnarsinnaanngilaq, Kattuffimmimi siulittaasoq partiinut ilaasortaaffeqaqqusaanngilaq.

Taannali qinigaassagaluaruni nunatsinnilu inatsisiliortunngussagaluaruni KNAPK-mulluunniit uteqqissanerluni suli aalajanginnglaa.

- Tassa taannaana qinersisartut aalajangigassaat. Qinersisartut aalajangeereerpata taanna eqqartuiffigiumaarparput, Nikkulaat Jeremiassen oqarpoq.

Kisimiinngitsoq

Nikkulaat Jeremiassenilu sulinngiffeqartuni kisimiinngilaq.

KNR-ip kattuffiup pisortaa, Vittus Qujaukitsoq Naleraq sinnerlugu aamma qinigassanngortittoq marlunngornermi apersorpaa.

Taassuma qinigassanngornermut tunngatillugu sulinngiffeqarnissamut qinnuteqaataa KNAPK-p siulersuisuuneranit marlunngornermi aamma akuerineqarpoq, pisortatutulli atuukkunnaarallarpoq.

- Sulinngiffeqarnissamut qinnuteqaatit marluk qineqqusaartoqarnerani aamma ataqqinnittumik inuit pisinnaatitaaffii eqqarsaatigalugit aamma akuersissutigineqarput.

Kattuffimmini allannguutini taakku kisimiinngillat. Niels Lorentzen siulittaasup tulliatut aamma ilaasortatut nammineq aalajangikkaminik tunuarpoq. Jens Meeraq Lyberth siulittaasumut tullersortinngorpoq, Ole Møllerilu Uummannameersoq siulersuisunut ilaasortanngorluni.

Kattuffiup siulittaasuata sulinngiffeqarnerani kattuffimmi kina siulittaasuugallassanersoq pisortaagallartunngortup, Mikael Petersenip, kattuffimmilu siulittaasumut tullinngortup, Jens Meeraq Lyberthip, akunnerminni aaqqissagaat Nikkulaat Jeremiassen oqarpoq.

- Kattuffik aamma ilumini atorfilittaqarpoq. Taakkulu pisortap tullia taamatut pisortaagallartutut inissisimavoq piffissap taassuma nalaani. Aamma atorfilittaallu eqqarsaatigalugit isumaqarpunga isumannanngitsumik sulineq ingerlaannartussaasoq.