KNAPK isumaqatiginninniarfigineqarsimagaluarpoq
Aalisartut piniartullu illoqarfinni Ilulissaniit Nanortalik tikillugu puisit amiinik ataasinngormat tunisisinnaajunnaarput. Pingaarnersiuinerlu tunngavigineqarluni illoqarfinni tunitsiviit matuneqartut, Great Greenlandimi pisortaq Henrik Estrup oqarpoq.
Kiffartuussinissamik isumaqatigiissut ukioq manna atuuttussaq, puisit amiinut 55.000-inut pisinissamik imaqarpoq.
- Nunaqarfinni isorliunerusuniittuni tunitsiviit ammatiinnarneqarnissaat siunertaralugu pingaarnersiuisariaqarpugut, tamatumalu kingunerisaanik illoqarfinni tunitsivinnik matusivugut. Tassalu Illoqarfinni Ilulissaniit Nanortalik tikillugu matusivugut, taakkuali eqqaanni nunaqarfinni tunitsiviit ammatiinnarneqarput, Great Greenlandip pisortaa Henrik Estrup erseqqissaavoq.
Uummannami, Upernavimmi, Qaanaami, Tasiilami Illoqqortoormiunilu tunitsiviit killilersorneqaratik ammaannassasut kiffartuussinermut isumaqatigiissummi piumasaqaataavoq, taakkualu ukioq naallugu ammatinneqarnerini puisit amii 40.000-it tunineqarumaartut naatsorsuutigineqarpoq.
Kiffartuussinissamullu isumaqatigiissummi pisissutigineqarsinnaasut sinneruttut puisit amiinut 15.000-inut naammapput, taakkualu kitaani atorneqassapput.
Puisit amii 15.000 kitaani tunitsivinni sorlerni tigoorarneqassanersut Great Greenlandip KNAPK-iumut decembarimi isumaqatigiinniutigiumavai.
- Pingaarnersiuineq qanoq iluseqassanersoq KNAPK-mut isumaqatigiinniutigigaluarparput. KNAPK-imiilli tamanna peqataaffigiumaneqanngilaq, Henrik Estrup oqarpoq.
Tunitsivinnik pingaarnersiuineq illoqarfinni Ilulissaniit Nanortalik tikillugu piniartunut aalisartunullu puisit amiinik tunisisartunut eqquivoq.
Great Greenlandimi pisortaq pingaarnersiuinerminni suut tunngavilersuutaanersut pillugit ima oqarpoq.
- Tassa nunaqarfinni piniartut tunitsivissaqarniarnermikkut allanik periarfissaqarpallaartanngillat, tamannalu nunaqarfinni arlalinni atuuppoq. Illoqarfinnilu piniartut aalisartullu pisaminnut tunitsivissanik allanik periarfissaqarluarnerusarlutik, soorlu fabrikkinut imaluunniit kalaalimineerniarfinni assigisaanilu, Great Greenlandimi pisortaq Henrik Estrup oqarpoq.
KNAPK-mi siulittaasoq Leif fontain isumaqatigiinniarnermut peqataajumannginnertik pillugu apeqquteqaateqarfiginiaraluaratsigut iluatsinngilarput.
