Sinerissap qanittuani avataasiorlunilu aalisarnerup immkkoortinneqarunnaarnissaannik, naalakkersuisut siunissaq isigalugu, anguniagaqarnerat KNAPK-mit akuerineqarsinnaanngilaq.
Nunatsinni aalisarneq ullummikkut immikkoortunut marlunnut avinneqarnikuuvoq. Avataasiorlutik aalisartut kilisaatinik angisuunik ingerlanneqarput tunisassiornerlu aallaaviginerullugu aalisartuullutik. Sinerissap qanittuani aalisartut kilisaatinit mikinerusunit ingerlanneqarput aningaasarsiornermilu sunniuteqarangaaratik.
Aalisarneq pillugu inatsisissami avataasiorlutik aalisartut sinerissallu qanittuani aalisartut immikkoortinneqartarnerat naalakkersuisut atorunnaarsinniarpaat, taamaalillutik pisassiissutigineqartartartut tamanut agguaanneqartalerlutik. Taamaaliornikkut pisassiissutigineqartut aalisarluartunut tunniunneqartarnissaat qulakkeerniarneqarluni.
KNAPK-ip siulittaasuata Peter Olsen-ip, naalakkersuisut siunniussaannut isumaqataanngilaq, avataasiorlutik aalisartunut sinerissallu qanittuani aalisartunut pissassiissutigineqartartut ataatsimoortinniarneqarnerat KNAPK-ip isumaqatiginngilluinnarpaa, Peter Olsen tusagassiuutinut taamatut allappoq.
Inatsisissatut siunnersuut naalakkersuinikkut aningaasaqarnikkullu ingerlatsinermut nalunaarusiaanni ukiormanna atuuttumi eqqaaneqarpoq, inatsisissatullu siunnersuut ukiup ingerlanerani inatsisartuni oqallisigineqaassaaq.
